Carmina (Horatius)/Liber I/Carmen XIX

E Wikisource
Salire ad: navigationem, quaerere
Liber I
Carmen XIX
23 a.Ch.n.
Fairytale left blue.png I, XVIII I, XX Fairytale right blue.png


Mater saeva Cupidinum
Thebanaeque iubet me Semelae puer
et lasciva Licentia
finitis animum reddere amoribus.
urit me Glycerae nitor
splendentis Pario marmore purius,
urit grata protervitas
et voltus nimium lubricus adspici.
in me tota ruens Venus
Cyprum deseruit nec patitur Scythas
et versis animosum equis
Parthum dicere nec quae nihil attinent.
hic vivum mihi caespitem, hic
verbenas, pueri, ponite turaque
bimi cum patera meri:
mactata veniet lenior hostia.

Fairytale left blue.png I, XVIII I, XX Fairytale right blue.png