Pagina:Poesie italiane.djvu/89

E Wikisource
Haec pagina emendata est
87

plures in stabulis equos pascas, aut aureis argenteisque vasis, et pretiosa supellectile domum instructam habeas, et alia hujus generis; quae qui habent, vulgi opinione magnifici judicantur. Habeant ista illi, qui in media urbis celebritate ac frequentia perpetuo versantur, qui per omnes fere domos quotidianam salutationem circumferunt, qui diem in tenebris, noctem in luce transigunt; uno verbo, qui in negotiis inertissimis occupati, nec aliis, nec sibi vivunt. Quid autem ad te, qui nunquam ferme domo egrederis, nisi quando id aut officium, aut necessitas postulat, paucosque habes, ncque ejusdem admissionis, amicos; sed magnam diei partem te intra tuum cubiculum contines, semper aliquid aut legens, aut scribens, aut minimo subinde volvens, laterique assidens castissimae conjugis, quae tibi simillima contigit, et qua cum, raro saeculi hujus exemplo, conjunctissime vivis?