I
[recensere]Sunt mihi diuerso uaria sub tempore fata:
Me pater in primis fecit sine matre supremus,
Postque per alterius genitoris semen in orbem
Consitus egrediens matris de uentre processi,
5Ecce sub ancipiti saeclo sine fine timendo
Ultima nunc trepide uereor iam fata superstes.
Quando miser nimium gelida sub morte rigescens
Matris et in propriae gremium deponar ibique,
Usque quo mortalis claudantur tempora uitae,
10Abditus exspectem sub morte nouissima fata,
Per genitorem iterum recreandus in ordine primo
In regione poli aut mortis sine fine manendus.
II
[recensere]Dum domus ipsa mea dormit, uigilare suesco
Atque sub angusto tenear cum carcere semper,
Liber ad aetheream transcendo frequentius aulam,
Alta supernorum scrutans secreta polorum.
5Omnia quin potius perlustro creata sub orbe,
Rura peragro salumque peto, tunc litora linquens
Finibus inmensum fundum rimabor abyssi.
Horrifera minime pertranseo claustra gehennae,
Ignea perpetuae subeo sed tartara Ditis.
10Haec modico peragro speleo si claudas in aruis,
Mortifero concussa ruant ni ergastula casu.
Sin uero propria dire de sede repellor,
Mortis in occasu extimplo fio pulpa putrescens :
Sic sunt fata mea diuersa a patre creata.
III
[recensere]De mare ueliuolo consurgo, per aera trano,
Aurea luciflui cedunt cui sidera caeli.
Postea horrifera uentorum mole reuincor,
Sicca peto subito terrarum terga resoluens
5Atque sub ingenti repeto sic murmure pontum,
Ast tamen imbrifero perfundo gurgite mundum,
Unde ualet populis spissam producere messem.
IIII
[recensere]Me pater ex gelido generat dum tergore matris,
Quamdiu horriferis ipsam complectitur halis
Magna sub ingenti mihimet patre corpora surgunt,
Donec ipse prius fato terrente recedat
5Aestibus ęthereis sole uaporante fugatus.
Tunc ego morte cadens propriam progigno parentem,
Tempore post iterum haut multo gignenda per ipsam.
V
[recensere]Lucidus et laetus quinis considere ramis
Saepe solent pariter splendentes, laeta iubentes
Aedibus in mediis fieri non tristia corda.
Dumque simul ludunt ramisque tenentur apertis,
5Dulcia quin bibulis tradunt et bassia buccis,
Mulcifer egreditur tantumque remanet adherens
Lucidus in ramis, quibus antea sedit uterque.
VI
[recensere]Nubibus e tetris uidi dilabere quendam.
Ipsa uelox cecidit super ardua tecta domorum,
Mollis erat uisu necnon lenissima tactu,
Inde cadens iosumque cauauit leniter asprum
5Dura super terram sibimet qui terga cadenti
Praebuit, infixus terrae stabilisque manendo.
VII
[recensere]Scribitur octono siluarum grammate lignum.
Ultima terna simul tuleris si grammata demens,
Milibus in multis uix postea cernitur una.
VIII
[recensere]En uideo sobolem propria cum matre morantem,
Mandre cuius pellis in pariete pendet adherens.
VIIII
[recensere]Candida uirgo suas lacrimas dum seminat atras,
Tetra per albentes linquit uestigia campos
Lucida stelligeri ducentia ad atria caeli.
X
[recensere]Saeua nefandorum non gessi furta latronum
Nec diro humanum fudi mucrone cruorem,
Sed tamen in laqueo reus ut fur pendeo longo.
Si quis at ardenti tangit mea uiscera flamma,
5Mox simul egregiam lumen dispergo per aulam.
Sicque meo noctis tetras depello tenebras
Lumine, clarifica perfundens luce sacellum.
XI
[recensere]Quando fui iuuenis bis binis fontibus hausi,
Postquam consenui montes uallesque de imis
Sedibus euertens naturae iura rescidi,
Post misero fato torpenti morte tabescens,
5Mortuus horrende uiuorum stringo lacertos,
Necnon humanis praebens munimina plantis
Frigoris a rigidis inlaesas reddo pruinis :
Sic mea diuersis uariantur fata sub annis.
XII
[recensere]Silua fui dudum crescens in sentibus aspris ,
Lymfa uelut fueram decurrens clara per amnem.
Tertia pars mihimet tradenda est arte reperta :
Lucifica nigris tunc nuntio regna figuris,
5Late per innumeros albos si spargas agellos ,
Necnon horrifera soleo tunc tartara tr<…>
Grammate terribili narrare uitanda <...> latu
(opinabiles)
I. de homine
II. de anima
III. de aqua
IIII. de glacie
V. de cupa uinaria
VI. de niue
VII. de castanea
VIII. de fetu
VIIII. de penna
X. de luminari
XI. de tauro
XII. de atramento