Caput 1.
[recensere]Si quis episcopus aut propinquitatis affectu aut muneris ambitione aut causa amicitiæ senodochia aut monasteria vel baptismales ecclesias suæ ecclesiæ pertinentes cuilibet per enfitheuseos contractus dederit se suosque successores pœna multandos conscripserit, potestatem talia mutandi rectoribus ecclesiarum absque pœnæ conscriptæ solutione concedimus.
Caput 2.
[recensere]Statutum est, ut si quis liber homo per consensum episcopi sui ecclesiam in sua construxerit proprietate, fontesque in eadem ab episcopo fuerint consecrati, ideo non suam perdat hereditatem: sed si episcopus voluerit, officium sacri baptismatis in suam transferat ecclesiam; ipsa vero a qua transfertur in constructoris maneat iure.
Caput 3.
[recensere]Si quis adulter cum adultera conprehensus, secundum edicta legis Langobardorum marito adulteræ ambo ad vindictam traditi fuerint, si eos quispiam emerit eosque coniunctos in eodem scelere habere repertus fuerit, ipsos fiscus adquirat.
Caput 4.
[recensere]Si quis liber homo uxorem habens liberam propter aliquod crimen aut debitum servitio alterius se subdit, infantes qui tali coniugio nati fuerint libertatis statum non amittant. Si vero illa defuncta secunda uxor, et tamen libera, tali se sciens iunxerit coniugio, liberi illorum servituti subdantur.
Caput 5.
[recensere]Statuimus ut, si femina habens vestem mutatam mœcha deprehensa fuerit, non tradatur genitio sicut usque modo, ne forte, quæ prius cum uno, postmodum cum pluribus locum habeat mœchandi; sed eius possessio fisco redigatur, et ipsa episcopali subiaceat iudicio.
Caput 6.
[recensere]Decernimus ut, quisquis aliter testes habere non potuerit, volumus, ut per comitis iussionem, quos in suo testimonio necessarios quisque habuerit, veritatem prolaturi publico conventu adducantur, ut per ipsos rei veritas cum iuramento valeat inquiri.