Carmina (Horatius)/Liber III/Carmen XX

E Wikisource
< Carmina (Horatius)
Jump to navigation Jump to search
Liber III
Carmen XX
23 a.Ch.n.
Fairytale left blue.png III, XIX III, XXI Fairytale right blue.png


Non vides, quanto moveas periclo,
Pyrrhe, Gaetulae catulos leaenae?
dura post paulo fugies inaudax
proelia raptor,

cum per obstantis iuvenum catervas
ibit insignem repetens Nearchum:
grande certamen, tibi praeda cedat,
maior an illa.

interim, dum tu celeres sagittas
promis, haec dentis acuit timendos,
arbiter pugnae posuisse nudo
sub pede palmam

fertur et leni recreare vento
sparsum odoratis umerum capillis,
qualis aut Nireus fuit aut aquosa
raptus ab Ida.

Fairytale left blue.png III, XIX III, XXI Fairytale right blue.png