Hæc in imagine in dextera parte scripta sunt: Imperantibus dominis nostris imperatoribus Hlothario et Hludowico augustis, mensis Decembris die XVI, indictione XIV.
Excommunicatio quam fecit Leo episcopus de Anastasio presbitero, et postea Adrianus.
Leo episcopus, servus servorum dei. Anastasius presbiter cardinis nostri, quem in titulo beati Marcelli ordinavimus, quique secedens ab eo ad alienas parrœchias absque nostra pontificali scientia demigratus est, quem per missos et litteras nostras vocavimus, et pro quo dominos imperatores supplicati per missos nostros, ut eum ad suam parrœchiam redire iuberent, qui nunc huc nunc illuc latitando in ipsa demigratione per biennium moratus est, et ad duo vocatus concilia nostra minime venit, sed neque inventus est, quia, ut prædiximus, veluti ovis errans extraneis regionibus, suadente diabolo, occulte inhabitat, secundum canonica statuta ex dei omnipotentis et beati Petri apostoli nostraque simul apostolica auctoritate ab hodie sit communione privatus, donec ipse meæ speciali præsentiæ in canonico iudicio fuerit præsentatus; et si non venerit, numquam communicet.
Post Romanum pontificem in hac excommunicatione consenserunt archiepiscopus Ravennatis ac Mediolanensis aliique numero LXXV.