I
[recensere]THAMYRA : LADAS : MIDA
TH. Te, formose Mida, iam dudum nostra requirunt
iurgia: da vacuam pueris certantibus aurem.
MI. haud moror; et casti nemoris secreta voluptas
invitat calamos: imponite lusibus artem.
5TH. praemia si cessant, artis fiducia muta est.
LA. sed nostram durare fidem duo pignora cogent:
vel caper ille, nota frontem qui pingitur alba,
vel levis haec et mobilibus circumdata bullis
fistula, silvicolae munus memorabile Fauni.
10TH. sive caprum mavis vel Fauni ponere munus,
elige utrum perdas; sed erit, puto, certius omen
fistula damnato iam nunc pro pignore dempta.
LA. quid iuvat insanis lucem consumere verbis?
Iudicis e gremio victoris gloria surgat.
15TH. praeda mea est, quia Caesareas me dicere laudes
mens iubet: huic semper debetur palma labori.
LA. et mi sidereo cor movit Cynthius ore
laudatamque chelyn iussit variare canendo.
MI. pergite, io pueri, promissum reddere carmen;
20sic vos cantantes deus adiuvet! Incipe, Lada,
tu prior; alternus Thamyras imponet honorem.
LA. maxime divorum caelique aeterna potestas,
seu tibi, Phoebe, placet temptare loquentia fila
et citharae modulis primordia iungere mundi
25carmine uti virgo furit et canit ore coacto,
fas mihi sit vidisse deos, fas prodere mundum
seu caeli mens illa fuit seu solis imago,
dignus utroque deo stetit ostro clarus et auro
intonuitque manu. Talis divina potestas
30quae genuit mundum septemque intexuit oris
artificis zonas et totas miscet amore.
Talis Phoebus erat, cum laetus caede draconis
docta repercusso generavit carmina plectro:
caelestes ulli si sunt, hae voce loquuntur!
35Venerat ad modulos doctarum turba sororum ...
TH. huc huc, Pierides, volucri concedite saltu:
hic Heliconis opes florent, hic vester Apollo est!
Tu quoque Troia sacros cineres ad sidera tolle
atque Agamemnoniis opus hoc ostende Mycenis!
40Iam tanti cecidisse fuit! Gaudete, ruinae,
et laudate rogos: vester vos tollit alumnus!
...
venerat en et Maeonides, cui plurima barba
albaque caesaries pleno radiabat honore.
Ergo ut divinis implevit vocibus aures,
45candida flaventi discinxit tempora vitta
Caesareumque caput merito velavit amictu.
Haud procul Iliaco quondam non segnior ore
stabat et ipsa suas delebat Mantua cartas.
II
[recensere]GLYCERANVS MYSTES
GL. Quid tacitus, Mystes? MY. Curae mea gaudia turbant:
cura dapes sequitur, magis inter pocula surgit.
Et gravis anxietas laetis incumbere gaudet.
GL. non satis accipio. MY. nec me iuvat omnia fari.
5GL. forsitan imposuit pecori lupus? MY. haud timet hostes
turba canum vigilans. GL. vigiles quoque somnus adumbrat.
MY. altius est, Glycerane, aliquid, non quod patet: erras.
GL. atquin turbari sine ventis non solet aequor.
MY. quod minime reris, satias mea gaudia vexat,
10GL. deliciae somnusque solent adamare querellas.
MY. ergo si causas curarum scire laboras -
GL. quae spargit ramos, tremula nos vestiet umbra
ulmus, et en tenero corpus summittere prato
herba iubet: tu dic, quae sit tibi causa tacendi.
15MY. cernis ut attrito diffusus cespite pagus
annua vota ferat sollemnesque incohet aras?
Spirant templa mero, resonant cava tympana palmis,
Maenalides teneras ducunt per sacra choreas,
tibia laeta canit, pendet sacer hircus ab ulmo
20et iam nudatis cervicibus exuit exta.
Ergo num dubio pugnant discrimine nati
et negat huic aevo stolidum pecus aurea regna?
Saturni rediere dies Astraeaque virgo
tutaque in antiquos redierunt saecula mores.
25Condit secura totas spe messor aristas,
languescit senio Bacchus, pecus errat in herba,
nec gladio metimus nec clausis oppida muris
bella tacenda parant; nullo iam noxia partu
femina quaecumque est hostem parit. Arva iuventus
30nuda fodit tardoque puer domifactus aratro
miratur patriis pendentem sedibus ensem.
Est procul a nobis infelix gloria Sullae
trinaque tempestas, moriens cum Roma supremas
desperavit opes et Martia vendidit arma.
35Nunc tellus inculta novos parit ubere fetus,
nunc ratibus tutis fera non irascitur unda;
mordent frena tigres, subeunt iuga saeva leones
casta fave Lucina: tuus iam regnat Apollo!