 Epistula |
Epithalamium Matthaei Andronici Tragurini in nuptias Vladislai invictissimi ac felicissimi Pannoniarum ac Boemiae regis et Annae Candaliae reginae serenissimae.
[recensere] Nondum intemptatas pubes irruperat undas 1
Thessala Phrixei cognatum velleris aurum 2
Exposcens necdum refluo vada concita motu 3
Consertisque iugis artatum evaserat aequor 4
Puppis Hyperboreum Minyas vectura sub axem, 5
Peleus eximiis quum iam virtutibus auctus 6
Sumpserat Emathiae sceptrum populosque regebat 7
Haemonios, icto qua cognita pascua Phoebo 8
Amphrysus placido sinuosus flumine lambit; 9
Sed nec adhuc magnae Thetidis flagrarat amore 10
Nec sociare toros taedasque subire iugales 11
Certus erat. Coeunt proceres cladique precantur, 12
Fatalem Phrygiae terris ut reddat Achillem, 13
Qui populos regat Emathios, quo vindice Troia 14
Hospitii meritas laesi det perfida poenas. 15
Iamque suis thalamis natarum Doridos unam 16
Peleus addiderat: glaucae coiere puellae, 17
Conveniunt superi festumque hymenaea frequentant 18
Sertaque dependent reseratis undique valvis 19
Aurea tecta patent, dant largos nectaris haustus, 20
Vernat flore caput, respondent Pelea Tempe, 21
Ossa Thetim resonant, Peneus sustinet undas 22
Cantibus attonitas stupefactaque flumina tardat. 23
Ecce iterum heroum redeunt felicia secla, 24
Rursus faustus Hymen et festae vincula taedae 25
Aspicis, aerea sonus ut prorumpat ab Alpe 26
Parrhasiique celer ripas festinet ad Istri. 27
Ducitur Arctoo Rhodani armipotentis alumna 28
Nupta Iovi, geminae cui Gratia nexa sorori 29
It comes et teneri pariter famulantur Amores, 30
Astat et usque novae lateri Cytherea maritae. 31
Aspice, ut Ausoniae geminatis plausibus urbes 32
Exultent, citharae coniunctaque tympana buxo 33
Tinnulaque aera sonent, blandae instrumenta Diones, 34
Non aliter quondam Graias hilaraverat urbes 35
Clamor ovans, domitis quum iam remearet ab Indis. 36
Liber et Eoas patriis imponeret aris 37
Exuvias festisque ululatibus orgia Bacchae 38
Concinerent vulsasque trabes et saxa rotarent 39
Maenades et scissis macularent arva iuvencis. 40
Ecce serenato pelluntur nubila caelo 41
Arridentque poli, suspendunt flamina venti 42
Atque immota sui miratur regna profundi 43
Nereus et refluos quae sistant numina cursus. 44
Quacunque ingreditur, dominae blanditur eunti 45
Terra rosas spargens, flatus dant nectaris aurae. 46
Haud aliter segetes Arabum vel divitis arva 47
Assyriae redolent, quum se novus induit annus 48
Floribus ac vernis opibus gemmantia rident 49
Prata et odoriferi mollis viget aura Favoni. 50
Hannibal et flammis et vi mordacis aceti 51
Temptet ver vetitae capturus moenia Romae: 52
Sponte sua attonitas animatis rupibus Alpes 53
Summittent cautes et saxa minantia caelo 54
Agnoscentque suae venientia numina divae. 55
Tu mihi legitimis facibus, Saturnia praeses, 56
Tu, Paphiae proles et casti cultor amoris, 57
Profer, Hymen, tantos quod numen iunxit amantes: 58
Quae festinati sacros Concordia nexit 59
Coniugii nodos, nexos quae Gratia sanxit. 60
Forte Dionaeos hortos sedesque petebat 61
Alma Venus Paphias pridem intermissa revisens 62
Regna sui manibus quondam fabrefacta mariti. 63
Circum aderant blandae Charites varioque volabant 64
More sagittiferi fratres: hi summa feruntur 65
Per loca caelestesque plagas passimque micantes 66
Incursant stellas, illi inferiore meatu 67
Purpureis summas pennis librantur in undas. 68
Iamque propinquabant adverso litore, Cyprus 69
Qua Pharii spectat septemflua cornua Nili. 70
Quum Venus affata est puerum, cui plurimus ignis 71
Aestuat et nullos telum frustratur in ictus: 72
"Quid cessas, ignave puer? quid, lente, moraris? 73
Quid non arma paras? num sat mugire iuvencos 74
Inter Agenoreos semel est fecisse tonantem? 75
An, postquam Eurotae cygneo carmine ripas 76
Mulsit et Iliaca praepes stetit ales in Ida, 77
Otia sunt ducenda tibi? cur spicula gestas 78
Irrita? cur cessans inglorius otia ducit 79
Nervus et aligerum mundus iam nescit Amorem? 80
Dic, age, post domitos superos, post caerula regni 81
Ad motus concussa tuos, post ferrea Ditis 82
Pectora lascivis tandem mollita sagittis 83
Torpet hebes telum, languet tibi dextera segnis!? 84
Quin, age, maioris spectat te pompa triumphi, 85
Auriflui cui nec Iovis aequiperaveris imbres 86
Nec molles habitus Lydae sub lege puellae 87
Clavigeri Alcidae nec amantis pascua Phoebi. 88
Sume arcum atque illo rursus praecingere telo, 89
Cui nec multiplici connexae adamante catenae, 90
Invius ipse mei non thorax Martis et aegis 91
Pallados obsistat, furvi non ora profundi, 92
Imperiurato qua Styx devolvitur amne. 93
Pannonii pete regna Iovis, qui coniugis expers 94
Contemnit mea regna; tuis hunc, nate, sagittis 95
Vince, truces animos, impervia pectora telis 96
Concute et ignotos, fac, sentiat ille calores! 97
Suspiret thalamos, mens tota in coniuge aberret 98
Sepositoque sui paulum moderamine regni 99
Ardeat arcanos refovens uxorius ignes!" 100
Dixit et ipsa suis manibus dea collocat arcum, 101
Suspendit nato pharetram selectaque ponit 102
Spicula et omnidomo succensas lampadas igne. 103
Evolat ille celer ripasque binominis Istri 104
Attigit armiferas, ubi Pannona terra cohortes 105
Explicat Othrysiae sese obiectura procellae. 106
Quisquis erat refugas doctus post terga sagittas 107
Mittere, qui iussas arcu contingere metas, 108
Qui iaculum torquere valent, cui fervida virtus 109
Hostilem suadet per mille pericula vallum 110
Scandere et eximium fecundo sanguine nomen 111
Quaerere, qui fidis novit loca commoda castris 112
Eligere et densas audet perrumpere turmas, 113
Stat promptus mediique exultans pulvere campi 114
Sithoniae iam nunc poscit concurrere turmae; 115
Hic caput aerata pictis cum casside conis 116
Integit; ille humeris gestat coryton et arcum; 117
Aurea flaventes huic velant retia crines 118
Arctoae de more plagae vel lactea colla 119
Implicat intextum gemmis auroque monile 120
Ille Semiramia variatum vellus ab arte 121
Pectore habet rigidus; huic tantum pectora munit 122
Sola chalybs, reliquo stat corpore pervius hosti; 123
Huic fronte in media pictas ligat aurea pennas 124
Concha et ab opposito radiat fulgentior aere; 125
Parte alia frenis artat spumantibus ora 126
Cornipedis cataphractus equi: fremit ille superbum 127
Insultatque solo ac tumidis sub naribus ignem 128
Colligit erectaque ferox attollitur aure. 129
Aspiceres illic populos utraque iacentes 130
Danubii ripa, rapidis quos circuit undis 131
Savus et adverso quos ambit flumine Dravus. 132
Illic Delmaticae gentes agilesque Liburni 133
Atque Polemonii proceres proceresque Boemi, 134
Denique Parrhasio quicquid sub cardine gentis 135
Regna tenent, aderat regi auxiliaribus armis, 136
Quoscunque in populos victricia signa movere 137
Et quocunque parat deterre ex hoste triumphum. 138
Regia selectis haec inter corda sagittis 139
Traicit acer Amor Paphiosque his addidit ignes. 140
Nec mora: Per teneras crescit nova flamma medullas, 141
Flamma Dionaei vires testata caloris. 142
Iam rex ignota suscepto vulnere dextra 143
Torpet et occultos fit alter et alter ad ictus. 144
Ardua non illum gemini moderamina regni, 145
Non urbes populique iuvant, non regia curae est, 146
Non, quae finitimus confinia proterit hostis, 147
Paeones hinc, illinc Thraces et Sarmata velox. 148
Non audire preces. suetas non condere leges, 149
Non equitum turmas, peditum non agmina curat. 150
Illud paulatim saevi Mavortis ab arte 151
Declinat pectus, non densas claudere valles, 152
Non temptare libet saltus aprosve frementes 153
Aut propriis fetas turbare cubilibus ursas. 154
Iam neque sidereas iuvat exercere per artes 155
Illud perspectae discussum mentis acumen 156
Cur Plaustra obliquo tardus temone Bootes 157
Conetur refugo frustra summittere ponto, 158
Quid tantum Oceano brumalibus obsita nimbis 159
Astra procellosos properent demergere soles, 160
Cur modo curvatam praetendat in aethere frontem 161
Cynthia, nunc plenum reparabilis attrahat orbem. 162
Cur eadem radios fratris populata micantes 163
Ingerat immodicum Phoebo male grata laborem. 164
Post tamen ipsa luat commisso crimine poenas, 165
Quam subito immissis pallens ac maesta tenebris 166
Nescit ab obiecta lucem sibi quaerere terra: 167
Haec et multa prius variis sibi cognita curis 168
Egregius belli ductor torpere relinquens 169
Cogitur insomnes suspirans ducere noctes. 170
Quique modo assuerat tragica gravitate superbus 171
Acta Sophocleis evolvere tradita chartis, 172
Nunc elegos molles mutato blandius ore 173
Concinit, exculti quos olim Musa Tibulli 174
Edidit et doctus, quo gaudeat Umbria, vates, 175
Teque, parum prudens gemini praeceptor amori; 176
Perlegit, extremas ponti qui missus ad oras 177
Caesaris es, nullo crimen delebile seclo: 178
Ingenii perit ille vigor divinus et ipsum 179
Deprimit Idalia durus cum matre Cupido. 180
Heu! tantum arcanos percussi pectoris ignes 181
Suspirat laesoque rubor se prodit ab ore 182
Obductas retegens flammas. Ah, nomen amantum 183
Immemor imperii quoties tua lingua locuta est?! 184
Te suspirantem nascentis lumina Phoebi, 185
Te medius Titan, te serus conspicit Hesper. 186
Ignotae haud aliter flagravit amore Lacaenae 187
Iliaca quondam lectus Paris arbiter Ida. 188
Dumque morae impatiens amor est, dum fervidus alto 189
Aestuat igne vapor Sicula ferventius Aetna, 190
Seligit e numero procerum, cui plurimus extat 191
Eloquii splendor, Pyliae cui mella senectae 192
Dulichiique oris torrentia flumina cedunt. 193
Cuius saepe fides in summis cognita rebus, 194
Orantem magnae stupuit quem curia Romae, 195
Cuius honorato praefulget vertice clarae 196
Pontificalis honos, pretium virtutis, et illi 197
Dat mandata suo referat quae nomine regi, 198
Cui regna Ausoniae, cui Gallica sceptra tenentur, 199
Cognatoque petat prognatam sanguine neptem 200
Sceptriferis thalamis et faustae foedera taedae 201
Acceleret certis sponsalia nectere verbis: 202
Non aliam se velle toris, quin caelibe lecto, 203
Invida coniugium si forte hoc fata negarint, 204
Tracturum vacuam ventura in tempora vitam. 205
Nam quum sollicitus gentes percurrat et urbes, 206
Nil habet Ausoniae plaga, nil Germania dives, 207
Cognati nil regna soli, nil ultima tellus, 208
Quae iam declives currus Phoebique cadentes 209
Sentit equos, tanto dignum succedere lecto. 210
Inter tot tantasque nurus, quas obtulit orbis, 211
Anna placet: solam mens saucia cogitat Annam. 212
At Venus haec inter Paphia iam sede relicta 213
Tyrrhenas spectabat aquas cognataque circum 214
Numina Nereidas, quas inter caerula Glauce 215
Frenatum delphina premit, Cadmeia virgo 216
Non sinit implicitos violis errare capillos, 217
Acidis aspecta praereptos Cypride amores 218
Suspirat Galatea sui Messeniaque antra 219
Devovet, at Spatale virides super aequoris undas 220
Marmoreo iactat gemmata monilia collo, 221
Candida Cymodoce toto stat corpore anhela 222
Amplexu Glauci iam iamque apprensa sequentis. 223
Has ita formoso vultu est affata Cythera: 224
"Este, deae, mecum taedas celebrate iugales, 225
Quales vix quondam stellantis regia caeli 226
Viderit, aethereo quum se Saturnia fratri 227
Iunxit et optatum soror est amplexa tonantem. 228
Desponsanda manet nunc regi regia virgo; 229
Nomen ab extremis ductum regale Britannis 230
Supremos hominum Morinos et Belgica regna 231
Quod rexit longumque reget: sic iusta tulerunt 232
Fata, adamanteae sic edixere sorores. 233
Improba nil unquam demissum vidit in illa, 234
Nil parvum fortuna domo, sed sceptra, triumphos, 235
Imperium, fasces: horum sit Celtica testis 236
Terra, Calidonii sint, ultima regna, profundi." 237
Iam dea contigerat Romani moenia Planci, 238
Qua celeres Arar et Rhodanus sua flumina miscent, 239
Et iam regali constructa palatia luxu 240
Intrarat. Bifores illic argentea valvas 241
Ostia pandebant. Illic contemptus achates 242
Et neglectus onyx teritur: non gratia ophiti 243
Ulla datur, nihil est illic Euboea Carystos, 244
Nil Ligurum lapides, nil inclyta saxa Laconum. 245
Parte omni fulvo trabs exaturata metallo 246
Pendet et attonitos hominum rapit undique visus. 247
Divitiis nec cedit opus, stant aera Myronis, 248
Stat labor, o Lysippe, tuus, tamen omnia vincit 249
Porticus antiquis patrum variata triumphis 250
Est illic Thybris, sunt captae moenia Romae, 251
Sunt et Aquitanis Capitolia vincta maniplis; 252
Arx Tarpeia manet graviori pressa periclo 253
Porticibusque cavis volitans argenteus anser. 254
Dum vigili attollit resonantia murmura voce. 255
Per rupem audaces testatur adesse phalanges: 256
Pensati est illic temerarius arbiter auri 257
Ensis et Ausoniae tot rapta insignia genti: 258
Parte alia Brennus per litora Graia cohortes 259
Sequanicas ductat, — iam se vix Delphica tellus 260
Numine Phoebeo nivibusque repente solutis 261
In proceres Gallos victriciaque arma tuetur. 262
Hos inter titulos antiqua ab origine patres 263
Candalii apparent et honorae stemmata gentis. 264
Ut primum visa est divinae stirpis alumna, 265
Obstupuit Cytherea decus mirata puellae, 266
Stellantes oculos primum, quibus urit amantes. 267
Ardet ut Oetaeis circumfluus humor in arvis. 268
Qui Phaethonteos iterum renovare calores 269
Evaleant totique ignes immittere mundo. 270
Unde suas solitus accendere saepe Cupido 271
Lampadas; ingenuae stat frontis gratia, sub qua 272
Excubat Euphrosyne geminam complexa sororem: 273
Pallados armiferae dignum stat Gorgone pectus 274
Atque Semiramia pharetra nodatur in aurum 275
Crinis Apollineo solus certare decori, 276
Dignus et auricomum Bacchi superare nitorem, 277
Qui valeat valeatque tuis contendere flammis, 278
Qui Bereniceo de vertice raptus ad astra 279
Ignivomum tremulo praefers fulgore cometen. 280
Cuncta animus vincit, quem non regina Scytharum 281
Massagis exuperet, hostem licet illa superbum 282
Ulta sit impune natum non passa iacere. 283
Femineos non illa colos, non pensa gerebat, 284
Nil privatum illi curae est, sed volvere libros, 285
Scire pudicitiae laudata exempla prioris, 286
Quot proba Penelope lustris errante marito, 287
Tempore quot belli repetitae stamine telae 288
Sit pactam tutata fidem, Lucretia morte 289
Ut subita immeritae exuerit mala crimina culpae. 290
Laodamia suo comes est ut facta marito 291
Praevenitque diem laeto. Stat virginis usque 292
Iphias ante oculos et casta Althaea pudicos. 293
Dotibus his alias addit: non pectinis illa 294
Nescia Threicii est, non saxa trahentis et undas 295
Ismeniae citharae. Quicquid cantavit Arion, 296
Quod Mytilenaea cecinit cum vate Corinna, 297
Quod Linus, hoc repetens modulatur regia virgo; 298
Aut ductat thyasos, quales non ante Cithaeron 299
Baccheis vidit festis, non flumina quondam 300
Thermodontiacas subito perpessa bipennes 301
Armigerae sobolis, postquam peltata virago 302
Depopulata Getam positis agit otia bellis. — 303
Huic Venus haec roseo confestim prodidit ore: 304
"Ecquid perpetuam dulci sine coniuge vitam 305
Nescia natorum, genialis nestia lecti 306
Sola trahes formaeque tuae decor iste peribit, 307
Cui nec Taenareae faciem conferre maritae 308
Graecia nec cursus Pisaea lege petitos 309
Audeat et multa dotatam caede puellam, 310
Illa licet Graias peritura in Pergama vires 311
Moverit et demum in patriam repetita cremarit 312
Laomedonteae fumantia moenia Troiae, 313
Fixerit haec foribus putri squallentia tabo 314
Ora suis victrixque ipsos damnarit amantes 315
Ad Phlegethonteae liventia stagna paludis? 316
O felix, cui te iungent bona fata marito, 317
Felix virgo, tua facies quem prole parentem. 318
Sed, quoscunque procos immensus detinet orbis, 319
Conspice, nemo tuis thalamis succederet unquam 320
Dignitor, Arctoae quam qui moderamina terrae 321
Bina tenet geminoque caput diademate cinctum 322
Irradiat, quem iam votis Germania regem 323
Mille petit cuique addictum testantia mittit 324
Dona amimum Thrace. Quae gens tam incognita nobis, 325
Sive sit Eoos Phoebi surgentis ad ortus, 326
Seu montes colat illa tuos, septemflue Melon, 327
Seu videt Hesperio pomaria tuta dracone, 328
Inclyta nescierit generis quae stemmata tanti 329
Atque Polemonios reges successaque sceptra 330
Per gentis seriem? quis aviti praelia belli 331
Nescit et extremo prostratos Marte Sicambros. 332
Aequarit cui nec celebratas sanguine Cannas 333
Hannibal Ausonio, Tyria non Scipio caede 334
Undantem Zamam, Marius non Cimbrica signa, 335
Theutonicos currus et capti vincla Iugurthae 336
Caesareoque genus maternum a sanguine ductum 337
Inque suis titulis ter Romae sceptra, ter auctos 338
Imperio proavos? cuinam se largius unquam 339
Furtuna indulsit quamve est complexa favorem 340
Tam iusto propensa domum? Nil grandius unquam 341
Parrhasii summo vidit sub cardine mundi 342
Torva Lycaonii sitiens custodia monstri. 343
Editus ut fuerat Tyrioque exceptus in ostro, 344
Iam regimen cum luce gerit patriosque triumphos 345
Vagit et hostili squallentia castra cruore 346
Incolit et mediis cunabula ducit in armis: 347
Intremuere Scythae, tanti praenuntia regis 348
Fata Getes timuit et mixtus Sarmata Daco. 349
Vixdum bis fuerat quinquennis Olympias acta, 350
Iam Scythicos arcus, iam Parthica tela, sagittas, 351
Iam Thracum norat pugnas animosque Laconum; 352
Ut Galli sua gaesa ferant, ut pila Latini; 353
Iamque hostem turbare gradu, iam caede superbus 354
Arma triumphanti captiva appendere curru. 355
Aspice, quid possit virtus, lanugine vixdum 356
Signabat malas, quum dant sua sceptra Boemi; 357
Hac etiam allecti regem fecere rogantes 358
Pannonii haud donis vel ambitione petiti. 359
Hic coniunx fatis, hic dis acceptus et astris 360
Iam pridem te, virgo, manet, quo nupta marito 361
Sidera sublimi caelestia vertice tanges." 362
Inde capit ceston, quo ventos illa furentes 363
Sistit et irati rapidos Iovis edomat ignes 364
Aspiratque faces et connubialia iura. 365
Senserat insolitos ignes non conscia amoris 366
Virgo prius; iam iam gaudet regina vocari, 367
Iam cupit e tanti collo pendere mariti 368
Incusatque moras et stantia tempora damnat 369
Sollicitisque frequens digitis dum computat horas, 370
Haud prius aspectum iam mens decurrit ad Istrum. 371
Ah, quoties regi dixit: "Quid vota moraris 372
Nostra? quid optatae producis foedera taedae?" 373
Non secus in Tyria Dido miserabilis urbe 374
Sensit Acidalium labefacta per ossa calorem, 375
Quum pius Aeneas Siculo iactatus ab aestu 376
Post patriae cineres, rapti post fata parentis 377
Sorte sua Libycis tandem sese appulit oris. 378
Dum pendet dubioque labant praecordia motu, 379
Spesque timorque instat: "Quae dis donaria vovit 380
Quaeve tulit?" — Sed pone metum, tam regia coniunx 381
Parrhasii tu sola Iovis visura cubile es. 382
Astat castus Hymen, tua qui connubia sanxit; 383
Duceris et tecum per devia saxa cohortes 384
Lingonicae properant; extrema tendit ab ora 385
Santonis Oceani. Lateri comes haeret euntis 386
Rex regum: Non ille truces ad bella Rutenos 387
Ducit et Alpino populari milite campos 388
Cogitat Ausonios, sed pacis plena verendae 389
Maiestas; saevi non horrida classica Martis 390
Triste minaxque fremunt, sed tota haec pompa triumphi, 391
Virgo, tui; Hesperias tecum, regina, per urbes 392
Belgica signa meant placidam portantia pacem. 393
Occurrunt Itali proceres atque obvia divae 394
Agmina agunt; numen selecto munere certant 395
Promeruisse novum: portatur, decolor Indus 396
Quicquid Erythraeis solers exquirit in undis 397
Callaicisque fodit terris quod sedulus Astur; 398
Quod Panchaeus Arabs metit felicibus arvis 399
Quaeque suis silvis extremi vellera Seres 400
Depectunt, quod bis cognato murice Sidon 401
Tingit et Idaea quicquid variatur ab arte. 402
Nativum decus ut spectetur divite cultu, 403
Gratius, o felix, ac terque quaterque beata 404
Aspicis Eridanum, quam se vix continet undis 405
Applaudatque tibi. Sudant electra sorores 406
Largius Heliades atque undas roribus augent 407
Gemmificis; dulci resonant modulamine ripae 408
Amnis oloriferi. Sic quondam Aegyptia coniunx 409
Romanis aquilis reduci occursura marito 410
Puppe papiriferi decurrit flumina Nili 411
Aurata Tyrio madefactum murice velum 412
Expandens Zephyris inter Cyllenia fila 413
Cognatae citharae strepitantiaque aera canoris 414
Continuata modis longique foramina buxi. 415
Coniugis hinc adsunt equitum peditumque catervae. 416
Lecta cohors, cinguntque latus fulgentibus armis. 417
Reginae variis vernant cum casside crines 418
Floribus, Ismenios simulant hastilia thyrsos. 419
Gaudia miles agit festoque haec carmine iactat 420
Militiae de more suae: "Quid, regia virgo, 421
Coniugis amplexus tardas atque oscula differs 422
Dulcia torquatas Veneris victura volucres? 423
Quae te pugna manet? Iam formidata Gelonis 424
Brachia constringent collum, velut implicat ulmos 425
Vitis et amplexas arbor Baccheia frondes 426
Flexipedi cingit nexu, iam dextera telum 427
Excutere assueta hostilique rubere cruore 428
Mitior incipiet teretes tractare papillas 429
Blandaque iam roseis condetur lingua labellis. 430
Cui nec Sicanium nectar nec mollis Hymetti 431
Mopsopios aequet succos annosa vetustas. 432
Virgineo videor sudantem cernere regem 433
Marte Dionaeae pugnasque ciere palaestrae. 434
Has ille exuvias, haec mavult ferre tropaea, 435
Quam si victa iugo collum det perfida Thrace, 436
India cunque suo Meroe circumflua Nilo. 437
Nascetur proles materno gratior ore 438
Plus de patre tamen referens; hunc, quantus in armis 439
Insurgat, toties fecundo sanguine Ganges 440
Decolor agnoscet, laxos huic porriget arcus 441
Parthia, odorati mittent sua thura Sabaei. 442
Sentiet hunc Garamas pronusque subibit habenas 443
Nobilioris heri, cedent sublimia gesta 444
Invicti Alcidae, summittet Pella triumphos 445
Extremo Phoebi nascentis ab orbe petitos." 446
| Epistula |