1. Grammatica
Exceptivam actionem
Verbum Patris excipit,
Dum deludit rationem,
Dum naturam decipit:
Casualem dictionem
Substantivum recipit,
Actioque passionem
In hoc verbo concipit.
In hac Verbi copula
Stupet omnis regula.
Verbum caro factum est.
2. Dialectica
Inter locos locum nescit
Locus a contrariis,
Suum locum obstupescit
Exceptum ab aliis:
Fit elinguis, obmutescit
Fallitur in propriis
Et de suis erubescit
Logica fallaciis.
In hac Verbi copula
Stupet omnis regula.
3. Rhetorica
Peregrinat a natura
Nominis positio
Cum in Dei transit jura
Hominis conditio.
Novus tropus in figura,
Nova fit constructio
Novus color in junctura
Nova fit translatio.
In hac Verbi copula
Stupet omnis regula.
4. Arithmetica
Dum ab uno non recedit,
Alteratur unitas,
Dum in unum se concedit,
Unitur alteritas:
In diversum idem cedit,
In idem diversitas,
Suum tamen non excedit
Limitem simplicitas.
In hac Verbi copula
Stupet omnis regula.
5. Musica
Dum Factoris et facturae
Mira fit conjunctio,
Quis sit modus ligaturae,
Quis ordo, quae ratio,
Quae sint vincla, quae juncturae
Qui gumphi, quae unio,
Stupet sui fracto jure
Musica proportio.
In hac Verbi copula
Stupet omnis regula.
6. Geometria
Suae artis in censura
Geometra fallitur,
Dum immensus sub mensura
Terrenorum sistitur,
In directum curvatura
Circuli convertitur,
Sphaeram claudit quadratura
Et sub ipsa clauditur.
In hac Verbi copula
Stupet omnis regula.
7. Astronomia
Solis lumen nube tectum
Nubis sub velamine,
Nostrae nubis fert objectum,
Nec hebet in lumine:
Nostrum vergit in defectum
Sol ortus de Virgine,
In defectum dans effectum
Lumen in caligine.
In hac Verbi copula,
Stupet omnis regula.
