 Seuerius |
Antonius Iuanus Cancellarius etc  |
Bonifacius Marchio Montis ferrati etc. Decet permaxime Principes eorum non silere commendationes qui fide ac deuotione non modo sibi deuinctos et affectos esse cognoscunt sed quorum uirtus ac scientia et mores ubique patent et illos sibi reddunt gratos et acceptos. Sane igitur attendentes praeclaras uirtutes scientiarum peritiam ac memoriam magnam prout nosipsi uidimus ac mirabiliter sumus experti spectabilis ac eximii Iuris utriusque doctoris et militis caesarei domini Petri de Tomasiis de Rauenna Paduae Ius Canonicum publice legentis nec non illius erga nos immensam et cordialem deuotionem singularemque affectionem merito inducimur illum corde diligere et inter charos nostros connumerare. Quamobrem uniuersis et singulis serenissimis dominis regibus illustrissimis principibus partibus inclytis dominiis magnificis capitaneis excelsis communitatibus strenuis conductoribus nobilibus et officialibus amicis et beniuolis nostris ad quos memoratus dominus Petrus declinauerit illum affectuose commendamus eosdem rogantes ut ipsum cum equis quinque et totidem personis suisque bulgiis ualisiis uestibus libris pecuniis rebus et bonis per omnes ciuitates terras et uillas castra oppida castella districtus et iurisdictiones et portus pontes et passus eundo et redeundo per terram et aquam die ac nocte semel et pluries absque solutione alicuius datii pedagii gabellae bulletarum strapassus tolonei fundi nauis et alia quamuis oneris exactione libere ac expedite dimittant pertransire: sibique prouideant de guidis scortis saluis conductibus fidis societatibus et aliis fauoribus oportunis quos requirendos duxerit benigneque illum recolligant humane suscipiant et gratiose tractent nostri contemplatione suarumque praeclarissimarum uirtutum intuitu: nam quicquid humanae recolligentiae benigni tractamenti propitiique fauoris sibi collatum extiterit nobis ad singularem complacentiam ascribemus: in quorum fidem praesentes nostras fieri iussimus et registrari nostrique sigilli impressione muniri: Datas Pontis turiae die .xxiiii. Septembris .M.cccclxxxviii.
| Seuerius |
Antonius Iuanus Cancellarius etc |