 Caput III |
Caput V  |
CAmara Brasilianis; diversae ejus reperiuntur species: Camara tinga et Camara flore albo: utraque autem fruticescit.
Camara flore rubro: caulis hujus hirsutus in multos expanditur ramos: folia habet serrata, menthae crispae similia, sed magis splendentia, leni hirsutie praedita, et ad tactum mollia, bina sibi invicem ubique opposita, quodlibet brevi pediculo insidens. In extremitate ramorum, uti et ad exortum foliorum ad caulem proveniunt oblongi pediculi aliquot juxta se positi, multos flosculos habentes rubros. Post flores sequitur uvula, baccis plena viridibus, magnitudine baccarum Sambuci: et uvula cum baccis similis est fructui Chamaepericlymeni Car. Clusii Rar. Histor. lib. i. cap. 38. Flos insignis odoris: et ipsa herba superat odore Mentham.
Huic plane similem speciem inveni ad ripam Fluvii Sti Francisci, excepto colore floris, qui plane flavus erat.
Camara flore albo: caule lignoso, duro, quadrato, hispido, in duorum aut trium pedum adsurgit altitudinem, atque in multos expanditur ramos; partim etiam caules longi in terram procumbunt, serpentes cum suis ramis. Folia autem habet rugosa, hirta et ad tactum dura, in ambitu serrata, splendentia, saturate viridia, bina semper sibi invicem opposita, et ad exortum ramorum sparsim. In extremitate autem ramorum et summitate caulis umbellatim proveniunt flosculi parvi, instar florum Lychnidis chalcedonicae, coloris candidi seu lactei, suavis odoris. Tota planta odorem habet fere instar Menthastri.
Camara Vvba Brasilianis, in eximiam altitudinem adsurgit, caule hirsuto, nodoso. Folia quoque hirsuta et ad tactum aspera, in ambitu serrata, urticae foliis similia, inaequalis magnitudinis, bina semper directe sibi opposita.
In extremitatibus ramorum enascuntur flores, magnitudine florum Bupthalmi, egregie lutei, novem foliis constantes, et in medio umbilico magno, luteo, cui ad mixta staminula nigra, odoris quasi medii inter urticam et mentham.
Planta ad tactum plane glutinosa sentitur.
Post flores sequitur semen oblongum, nigricans. ut in cichorejo.
Icon quam hîc damus, quanquam illam acceperimus cum adscripto nomine Camara uuba, potius videtur alterius Camarae de qua ante Author; nam manifeste baccas pro fructibus representat; cum huic tribuantur semina oblonga instar cichorei; quod hîc monendum duximus, ne quis erret.
Caeterum haec videtur illa planta quam Fr. Ximenes scribit à Mexicanis vocari Tomatzitzicaztli, quae species, inquit, est urticae, atque in molem humanam adolescit; folia habet succida, grandia et plena spinis et villis, caules laeves et blancos, flores luteos. Nascitur locis calidis et frigidis Provinciae Mechuacanae et alibi: saporis est amari, cum quadam acrimonia, temperie calida et sicca. Decoctum spissatum curat ulcera vetera, et lenit dolores capitis, si illa abluatur.