Chorus.
Quotquot terram habitamus,
Juncti stemus basio!
Fratres! in aetherio
Polo Patre freti stamus.
Fidum qui amicum fovet
Brachiis fidelibus,
Fida cui se uxor vovet,
Laetis adsit coetibus,
Qui vel unicum amore
Vinctum pectus habeat!
Huic qui inpar, is dolore
Genas tingens abeat.
Chorus.
Quaerant mutuum amorem,
Vincla omnes tenera!
Amor supra sidera
Summum fert nos ad Rectorem.
Suo quemlibet Natura
Mater beat ubere;
Pius quisque, gensque dura
Nectar quaerit ducere;
Nos amica fides, vina,
Nosque beat suavium;
Mens coelicolam divina,
Vermem breve gaudium.
Chorus
An praesentem divinatis
Turba Patrem cernua?
Astra tenet ardua
Rex aeternae majestatis.
En Naturae sola motat
Machinam Laetitia,
Illa mundi stellas rotat
Per inmensa spatia.
Terrâ verni decus floris,
Coelo soles elicit,
Variisque novum horis
Orbi decus adjicit.
Chorus.
Soles uti radiantes
Suis volant orbitis:
Vestris ite semitis,
Ceu triumphos exspectantes!
Veritatem inquirenti
Prosperato studio,
Mala fortiter ferenti
Insperato praemio,
Sanctâ Numinis effato
Fretis confidentiâ,
Cunctis victo mortis fato
Adnuit Laetitia.
Chorus.
Mala aequi tolerate,
Mala vitae brevia!
Magna coelis gaudia
Tum a Deo exspectate!
Dona digne conpensare
Nunquam possis Superis;
Illos ergo aemulare,
Beans mentem miseris.
Noxas inmemor demerge,
Nullam posce victimam,
Poenitentiae absterge
Reo clemens lacrymam!
Chorus
Culpae nota sit deleta!
Sonti detur venia!
Patris ut clementia
Spes tum possit esse freta.
Chorus
Coeli quem colunt stellantes
Coelitesque cantibus,
Deum his calicibus
Adoremus exsultantes!
Mala ferte pervicaces,
Debellate scelera!
Sancta colite veraces
Hosti quoque foedera!
Masculâ virtute stemus
Regis ante solium,
Meritoque vindicemus
Suum cuivis praemium!
Chorus.
Dextras ergo sociate!
Hunc per vini laticem
Et per Deum Vindicem
Haec fideles adjurate!
Camoenarum potentia