Migne Patrologia Latina Tomus 89
Hymnus de S. Benedicto (Cyprianus Cassinensis), J. P. Migne
Hymnus de S. Benedicto
(1051A)Aureo solis radio perennis
Hac die totus decoratur orbis,
Ut tuis, felix Benedicte, festis
Clarior adsit.
Bella mirandis opulenta factis,
Signa virtutum, speciale munus
Regulae, praebent tibi sempiterno
Tempore laudes.
Claret aetatis teneris ab annis
Moribus, vitam quibus ordinasti,
Cum voluptati dederis nec ulli
Intima cordis.
Deditur tanto prius in triumpho
Vas quidem fractum, muliebre damnum.
Quod puer sanum prece lacrymosa
(1051B)Restituisti.
Exhibens sanctum celer institutum
Arctius, summum, studiis relictis
Rebus et patris, fugis, et salubri
Veste bearis.
Foveras antro tua membra parvo
Mensibus versis novies quaternis,
Quo manens nullis hominum, sed uni
Notus haberis.
Grata divino tibi festa nutu
Conferunt pastum, latitans videris,
Fama fit, vulnus perit omne mentis
Vulnere carnis.
Hinc crucis signum vitreum veneni
Poculum frangit, vaga mens fugatur
(1051C)Virgulae tactu, fluit e cavato
Marmore lympha.
Insilit ferrum capulo reversum,
Mollis humanos regit unda passus,
Qua tuam ruptus Placidus melotem
Cernere fertur.
Charus horrendum tulit ales escam,
Fles nimis sontis nece motus hostis:
Et loco cedens solito, petisti
Lyris amoena.
Lubricus strata furit anguis ara,
Aggravat pondus, strepit igne falso:
Sed nihil contra valet inchoatum
Ferre laborem.
Membra collapso lacerata muro
(1051D)Sana redduntur, patulo probantur
Fratribus furtim malefacta, regis
Panditur actus [ F., astus].
(1052A)Noxa libantem necat, et ruina
Sedis electae patet, obtinentur
Spiritus, rapto latitare vino
Cernitur hydrus.
Objicis fratri quod inane fecit,
Inspicis mensem penitus rebellem.
Copiam prodis, gravidisque somno
Consulis index.
Perfidos tellus procul egit artus,
Sistit errantem draco, cessit ulcus
Regium, nummi subiere, fugit
Horrida pestis.
Quod cadit vitrum, patet esse salvum,
Vasa producunt oleum, chelydrus
Pellitur dextra, manuumque lora
(1052B)Visio solvit.
Reddito vitae puero, subire
Coelicas sedes animam sororis,
Et velut solis radio sub uno
Omnia cernis.
Scandit ardenti sacer orbe praesul,
Tu via, coelum, facibus corusca,
Quando ter ternis tribus et Kalendis
Instat Aprilis.
Te canit laetus chorus angelorum,
Patriarcharumque, et apostolorum,
Et prophetarum, meritis ab omni
Parte beatum.
Ut sit hujus plebs memor ista laudis,
Hic ames dici pater, hanc decenter
(1052C)Si doces, laute refove, polumque
Scandere praebe.
Christe devoti pretium laboris,
Confer istius prece nos juvari,
Cujus exemplo peritura foedi
Liquimus orbis.
Hymnus hic noster, Benedicte princeps,
Sit tibi semper placidus, tuorum
Qui salus es, lux, decus et perennis
Laus monachorum.
Meta coelestis pretiosa Regis
Te facit veris celebrem tropaeis.
Unde nos semper petimus frequentes
Nocte dieque,
Doxa sublimi maneat Parenti,
(1052D)Ejus et sacro diadema Nato,
Et tibi, virtus utriusque compar,
Spiritus alme. Amen.