Nemo innocens est
NEMO INNOCENS EST
Nemo innocens est in sero autumno.
Rubus ater, herba flavovirens.
Sol — orbis clarus et imbecillus
in caelo canescente; ultimis
viribus lumen fundit atque illustrat.
Nemo innocens est in sero autumno.
Ipsa natura insidias et fallaciam tegit.
Dies apricus, placidus et quietus,
in occasu. At nemo iam
omnino placidus et quietus est.
Natura insidias et fallaciam tegit.
Omnia — simulacrum sunt.
Nemo innocens est in sero autumno.
Arcanum quod natura tam diligenter celat
hoc est: senuit, et somno inclinatur,
et paulatim iam
hiemi se parat.