editio: ex ´Paedologia Petri Mosellani Protegensis in puerorum usum conscripta´. Ed. Hrsg. von Hermann Michel. Berolinum. Weidmann. 1906
fons: www.stoa.org
 Dialogvs XVII |
Dialogvs XIX  |
DIALOGVS XVIII. De canticis deque feriis divi Martini.
Personae:
Georgius, Conradus.
Georgius
Age, mi Conrade, quo cantico per hanc hiemem stipem colligemus? Etenim in hac urbe mos est, ut scholastici aliquot coniunctim compositis in hoc cantilenis divitum convivia exhilarent.
Conradus
Tuum hoc fuerit disquirere, qui rei musicae peritiam habes quique huius scholae melius quam ego tenes.
Georgius
Quando in me hanc curam reicis, aliquid minime vulgare dispiciam. Sed die ab hinc octavo quid fieri soleat, nosti?
Conradus
Dic quid?
Georgius
Erunt tum feriae praecidaneae divi Martini.
Conradus
Quid tum?
Georgius
Est tunc messis nobis scholasticis uberrima, siquidem in eius diei vespera non esculenta solum nobis largius solito dantur, sed et stipem egenis dari ostiatim est receptum.
Conradus
Bene mecum agetur, quandoquidem corrasurum me spero, quo hiemem commodius transigere valeam.
Georgius
Ita spero quidem ; quare ad tempus ut praesto sis, vide.
| Dialogvs XVII |
Dialogvs XIX |