editio: ex ´Paedologia Petri Mosellani Protegensis in puerorum usum conscripta´. Ed. Hrsg. von Hermann Michel. Berolinum. Weidmann. 1906
fons: www.stoa.org
 Dialogvs XIX |
Dialogvs XXI  |
DIALOGVS XX. Hippolytus et Cletus de frigoris iniuria queruntur.
Personae:
Hippolytus, Cletus.
Hippolytus
O quam sunt felices, quibus per opes iam licet domi ad caminum aut calefactum tabernaculum adsidere!
Cletus
E diverso quam nos infelices, qui miseri nullis pellibus, immo nullis paene vestibus adversum frigoris iniuriam armati per medios imbres, nives et glaciem ostiatim quaerere victum cogimur! Sed solatur me illud Flacci:
Qui cupit optatam cursu contingere metam,
Multa tulit fecitque puer, sudavit et alsit,
Abstinuit Venere et Baccho, qui Pythia cantat...
Alioqui, si similis esset exitus illorum et noster, non esset, cur non iniurium Deum dicerem, qui tam inique res humanas administraret.
Hippolytus
Quin taces! Ne quid ferocius in Deum effutias!
| Dialogvs XIX |
Dialogvs XXI |