editio: ex ´Paedologia Petri Mosellani Protegensis in puerorum usum conscripta´. Ed. Hrsg. von Hermann Michel. Berolinum. Weidmann. 1906
fons: www.stoa.org
 Dialogvs XX |
Dialogvs XXII  |
DIALOGVS XXI. De feriis divi Nicolai deque creando episcopo.
Personae:
Lucanus, Statius.
Statius
Quid tu nobis adfers novi, mi Lucane?
Lucanus
Nihil, sed in hoc te convenio, ut de communibus studiis fabulemur.
Statius
Gratus ergo mihi tuus est adventus; adside huc nobis.
Lucanus
En adsideo. Scis, quid in divi Nicolai feriis apud nostrates fieri soleat?
Statius
Qui ipse possem scire, cum illic fuerim nunquam?
Lucanus
Dicam ergo paucis: qui ludum illic litterarium frequentant, ex ludimagistri praescripto quempiam e suo grege episcopum creant eumque magna pompa domum, deducunt et stato tempore in templum reducunt.
Statius
Quid commodi inde capit novus ille et facticius episcopus?
Lucanus
Nescio, nisi quod convivio tandem nescio cuius sumptu instructo excipitur et tum lautissime tractatur.
Statius
Non et interim, dum est in magistratu, vacationem a discendi munere habet aut aeque ac ceteri manum ferulae subdit?
Lucanus
Aeque omnino adeo, ut non magis sit episcopus, quam sunt hi reges, qui in tragoediis Agamemnonis aut Priami personam gerunt.
Statius
Eiusmodi honorem mihi ne optarem quidem.
editio: ex ´Paedologia Petri Mosellani Protegensis in puerorum usum conscripta´. Ed. Hrsg. von Hermann Michel. Berolinum. Weidmann. 1906
fons: www.stoa.org