editio: ex ´Paedologia Petri Mosellani Protegensis in puerorum usum conscripta´. Ed. Hrsg. von Hermann Michel. Berolinum. Weidmann. 1906
fons: www.stoa.org
 Dialogvs XXV |
Dialogvs XXVII  |
DIALOGVS XXVI. Valerius et Nicolaus de cereis in feriis beatae virginis gestandis agunt.
Personae:
Valerius, Nicolaus.
Valerius
Quid tu cereum non habes, mi Nicolae?
Nicolaus
Vnde haberem, qui nec pecuniam, qua victum emere possim, habeo? Sed si domi apud meos agerem, nugas eiusmodi mihi pararet mater.
Valerius
Et tu nugas vocare audes res sacras?
Nicolaus
Quidni? Neque enim statim fuero haereticus, etiamsi nullum gestem cereum, maxime cum non sit, unde emam; tum et Christo putarem longe fore gratius, si sumptus, quos cereis emendis facimus, in pauperum usus converterentur.
Valerius
Atqui est haec laudabilis consuetudo.
Nicolaus
Est omnino, sed non adeo, ut prae ea meliora et magis Christiana officia neglegi debeant.
Valerius
Recte putas, nam et ipse saepe stultam muliercularum pietatem risi, quae suffigendis etiam cotidie cereis triginta sex adeo sibi placent, ut per hoc caelum se demereri credant, quantumvis fortiter in plateis pauperes esuriant.
| Dialogvs XXV |
Dialogvs XXVII |