Jump to content

Pagina:Decem fābvlae pverīs pvellīsqve agendae.pdf/69

E Wikisource
Haec pagina nondum emendata est
[Dēscendunt silentiō Machaōn, Thessandrus, Sthenelus, Acamās, Thoās, Neoptolemus, Menelaus, Ulixēs, Epēus.]
MEN. Tibi, O Ulixēs, grātiās agimus, quia hoc cōnsilium audāx excōgitāvistī, et Epēō, quia equum līgneum fabricāvit. Prīmō ad portam maritimam tendēmus; cum vigilēs occīderimus et portam reclūserimus, in Trōiānōs dormientēs invādēmus. Silentiō prōgrediminī! Ad portam maritimam!


SCAENA TERTIA. IN ĀTRIŌ RĒGIŌ.


Āra in mediā aulā stat. Ā tergō stat Priamus senex; circum rēgem ancillae lacrimant.

PRI. Arma mihi date, ancillae. [Alia lōrīcam, alia galeam, alia ocreās ferunt.] Aptāte lōrīcam, fīgite ocreās, galeam in capite impōnite. Festīnāte! Nōnne hostēs meam in urbem invāsērunt? Nōnne meōs fīliōs et comitēs et amīcōs caedunt? Sī ego meōs dūcam, etiam nunc dī nōbīs victōriam dabunt.
[Intrat Hecuba.]
HEC. Quid facis, miserrime vir? Cūr tē hīs armīs cingis?
PRI. Rēx sum; Trōiānōs ad victōriam dūcam. Clipeum meum mihi date et gladium.
HEC. Quō ruis? [Priamus gladium clipeumque sūmit.]
 Nōn tālī auxiliō, nec dēfēnsōribus istīs
 Tempus eget.
PRI. [gladium tractāre cōnātur.] Senex nōn possum id quod faciēbam iuvenis.