lictis majōrum suōrum institūtis, gentilium rītu viverent: āras falsis Diis per universam Judæam extruxit: omnia templi Hierosolymitani ornamenta detraxit: libros sacros jussit combūri: reluctantes inaudītis suppliciis affēcit: urbem innumerâ cæde vastāvit: ac, ne Judæi tot malis oppressi rebellārent, præsidium in arce collocavit.
Ex Judæis multi patriam deseruērunt, declinandi periculi caūsâ: multi mortem oppetiērunt, potiùs quàm à lēge divinâ discederent.
Insignis fuit Eleazari senis constantia: is, aperto ōre, compellebātur carnem suillam comedere, quâ Judæis lex interdicēbat.
At vir fortissimus cibum vetitum respuēbat indignans: quamobrem quùm ad supplicium ducerētur, sui eum amīci hortabantur ut aliam carnem, quam attulerant, comedendo, simulāret se rēgi paruisse, sicque mortem vitāret.
Eleazarus rem prāvam suadentibus noluit assentīri: Ætati nostræ, inquit, non convenit ista simulatio; non committam ut perniciōsum exemplum adolescentibus relinquam: multò satiùs est perīre quàm propter brevem vītæ usūram, turpitudinis notam meo nomini inurere. Si vestro obse-
