nâ pietāte degenerāvit, namque Athaliam impii Achābi filium duxit uxōrem, fuitque socero quàm patri similior. Gravi morbo, quem Deus immiserat, consumptus est.
Post hunc Ochosias filius regnum adeptus est, nec diù tenuit; nam pessimæ mātris exemplo ad vitia impulsus miserè interiit.
Mortuo Ochosīâ, māter ējus stirpem regiam interēmit, et regnum occupāvit. Unus tantùm Ochosīæ filius nomine Jōas promiscuæ cædi ereptus fuit, et in templo cum nutrice occultātus.
Hunc Joiadas Pontifex in templo clanculùm aluit, atque educāvit. Post annos ferè octo puerum regium centurionibus et plebi coram produxit, occisâque Athaliâ in regnum restituit.
Jōas, quandiù consiliis Joiadæ ūsus est, observantissimus fuit divīni cultûs, magnis sumptibus templum exornāvit.
Sed Joiadâ mortuo, aulicōrum adulatiōne corruptus ad vitia deflexit, vēramque religiōnem deseruit.
