Non ultra biennium regnāvit, et à suis domi interfectus est.
Cui successit Josīas, vir sanctus et religiōsus: is a puero virtūti deditus, populum ad legitimum cultum revocāvit.
At illum deindè inconsiderāta fiducia perdidit; nam contra Egyptios exercitum duxit, admonitusque à Deo ut prælio abstinēret, nihilo minùs acie dimicāvit. Itaque, re malè gestâ, vulnus accēpit, et paūcis pòst diēbus mortuus est.
Josīas moriens tres relīquit filios: ex his Joachas tres duntaxat menses regnāvit; bello captus est ab Assyriōrum rēge.
In Joachæ locum suffectus est Jechonīas, quo regnante, Nabuchodonosor, Babyloniōrum rex, Hierosolymam expugnāvit; cīves Babylōnem transtulit, relictâ vili plebeculâ, cui præfēcit Sedeciam, postrēmum rēgem.
Quùm Sedecias rebellasset, Nabuchodonosor reversus urbem diruit, templum incendit, Sedeciam, effossis priùs oculis, in carcerem mīsit.
Inter captīvos, qui Babylōnem abducti fuerant,
