Pagina:Francisci Xaverii Alegre Homeri Ilias Latina.pdf/283

In Superum genus omne Jovis rabiesque, furorque
Ni Patris verita imperium, clademque minantem
Armipotens Pallas stellata sede relicta
Adversum staret, capitique, humerisque furentis
 120Ingentem traheret clypeum, galeamque comantem,
Eque manu ferro præfixum hastile corusco.
Dein sic orsa loqui: Vecors, malesane, peristi.
An frustra tibi sunt aures, cerebrumque, pudorque
Omnis abest? Audisne Jovis quæ nuntia conjux
 125Dicta refert? magis an velles mala plurima passus,
Afflictusque, dolensque altum vix scandere Olympum,
Aerumnasque graveis Divis inferre beatis?
Nam pater extemplo, Teucris, Danaisque relictis,
Clicolas contra irarum converteret æstus,
 130Correptosque simul sceleratos, inque nocenteis
Dejiceret cœlo. Insanum depone furorem,
Tu precor, Ascalapho aut cecidit jam fortior alter,
Aut cadet. An clara Divum de stirpe creatos
Terrigenas facile est omneis subducere lætho?
 135Tantum effata Deum fulgenti in sede locavit.
Tum Phoebum Juno, & celerem Thaumantida plantis
Ad sese vocat, atque alto sermone profatur:
Ocyus Idæum genitor conscendere culmen
Vos jubet, ite citi, & jussis parete volentes.
 140Dixit, & abscedens solio in fulgente resedit
Adproperantque olli, atque Idæa in culmina tendunt
Fontibus irrigua egelidis, tesqua alta ferarum.
Atque Jovem procul adspectant super alta sedentem
Gargara, odorato nubes quem candida amictu
 145Pendebat circum. Venienteis ore sereno
Excipit æthereus genitor, nam conjugis almæ
Paruerant jussis celeres, tum talibus infit:
Iri, age, Neptuno hæc Regi mandata referto:
Abscedat pugna, & divum stellantia templa
 150Vel canum petat Oceanum; si obsistere certat,
Cogitet, an mecum quanquam fortissimus, ausit