Pagina:Francisci Xaverii Alegre Homeri Ilias Latina.pdf/298

Horrendum insonuit capiti galea alta cadentis
Priamides volat, & sociorum ante ora suorum
Pectora transfigit ferro: infremuere sodales
Adstantes; sed enim trepidos timor alligat artus,
 620Conscenduntque rateis turmatim, atque ante jacentum
Certant se rostris tegere, & cohibere ruenteis.
Acrius hoc instant Troes, primisque relictis
Puppibus, abscedunt Danai tentoria ad alta,
Nec per castra viros patitur timor ire vaganteis
 625Aut pudor, inque vicem crebris se hortatibus urgent
Quos inter medius charorum nomina Patrum
Commemorans, juvenum accendebat pectora Nestor:
Nunc aliorum alii vultus reveremini, & ora,
O Danai, & charam uxorem, tectumque, lareisque;
 630Et gnatos animo, & dulceis revocate parenteis.
Vel jaceant, vel adhuc coelo potiantur, & aura.
Hos per ego absenteis supplex vos deprecor, hostem
Sistite vos contra, neque retro avertite gressum.
His dictis commoti animi, nubemque removit
 635Caelitus immissam divino lumine Pallas.
Clarescunt subito puppes, pugnæque cruentae
In mediisque furens cristatus cernitur Hector
Dardanidumque acies, seu quæ post terga quiescunt,
Seu quæ de ratibus pugnant, sudantque sub armis
 640At non lentus ubi Danaum stat turba paventum
Se tenuit Telamone satus, sed fervidus altas
Per puppeis, per celsa volans tabulata recursat
Ingentemque manu contum, validumque, & ahenis
Orbibus accinctum versat, cui fraxinus ingens
 645Bisdenos cubitos in longum extenditur ultra.
Ac veluti doctus magnorum agitator equorum,
Quatuor ingenteis multorum ex agmine lectos
Nectit agens procul ab campo, qua publica in urbem
Fert via stant circum attonita matresque, virique
 650Ille sedens firmo, jamque hunc se corpore librat,
Jamque illum super alternans, illi ocyus Euris