Insonat Aeacidae; at vocem ut sensere cohortes
Æratam, ingentem subito obriguere pavore,
Turbaque cornipedum retro volat incita equorum
Pendentis præsaga mali, neque flectere currus
230Aurigae poterant trepida formidine inertes
Pelidæ ut super ardentem cava tempora flammam
Conspexere procul, fovet hanc nam cæsia Pallas.
Terque altam ad fossam torvum inclamavit Achilles,
Terque Phrygum turbate acies, Lyciæque catervæ
235Et bissena virum lectissima robora Teucrum
Dum properant, seseque urgent trepidante tumultu
Inter equos, interque rotas, turbamque, suismet
Procubuere hastis. Patrocli sic corpus Achivi
Extractum procul ab telis in castra tulerunt.
340Exanimumque locant feretro: maestissima circum
Turba virum stabat, primus quos inter Achilles
Hærebat, largoque simul fletu ora rigabat
Pallenteisque genas, & hianteis sanguine plagas
Adspectans socij exanimis, læthoque rigentis,
245Quem peditum miser, atque equitum comitante caterva
Miserat in pugnam, accepit non inde reversum.
At Phoebum Oceani invitum se immergere limphis
Alma jubet regina Deum Saturnia Juno.
llle cadit, simul & fessis certamina Gratis,
250Armorumque furor cessat, Martisque labores.
Dardanidæ interea pugnæ ab discrimine longe
Solvebant bijuges raptim de carribus altis,
Atque incoenati in cœtum coiere frequentes.
Stantesque, ac trepidi (nec enim considere quemquam
255Formido patitur, postquam conspectus Achilles
Intermissa diu aggredier certamina Martis.)
Conveniunt tum Polydamas Panthi inclyta proles,
Præteriti nam docta viro; & præsaga futuri
Mens erat, æquævusque idem[1], charusque sodalis
- ↑ V. 259. Aequaevusque idem. Sic & Mimantem aequævum Paridi fecit Virgilius:
Paridisque Mimanta
Aequalem, comitemque, una quem nocte Theano
In lucem genitori Amyco dedit & face pregnans
Cisseis Regina Parin creat.
Ita ille in 1, ubi duo notanda, primam quod Theano Amyci uxorem fecerit, quum Antenoris uxor, & Minervæ Sacerdos sit apud Homerum nisi forte nomen, utcumque a Virgilio fictum dicas cum Ruaeo, & aliis, quod non placet. Secundum, quod Hecubam Cisseidem vocaverit, sive Cissis Thraciae Regis filiam, quum Homerus Theano quidem Cisseidem haud semel sive Cissim filiam, Hecubam, vero nunquam ita appellaverit, sed Dymantis Phrygis filiam fuisse dixerit, ut dictum alibi.
