bus Romanorum, sparsos milites per Numidas persequutus, eorum exercitum fudit, in illam diem terra marique victorem.
12. Epaminondas[21], dux Thebanorum, adversus Lacedæmonios directurus aciem, pro fronte ejus decurrere equitibus jussis, quum ingentem pulverem oculis hostium objecisset, exspectationemque equestris certaminis prætendisset, circumducto pedite ab ea parte, ex qua decursus in aversam hostium aciem ferebat, inopinantium terga adortus cecidit.
13. Lacedæmonii trecenti[22] contra innumerabilem multitudinem Persarum, Thermopylas occupaverunt, quarum angustiæ non amplius, quam parem numerum cominus pugnaturum, poterant admittere: eaque ratione, quantum ad congressus facultatem, æquati numero barbarorum, virtute autem præstantes, magnam eorum partem ceciderunt: nec superati forent, nisi per proditorem Ephialten Trachinium circumductus hostis, a tergo eos oppressisset.
14. Themistocles, dux Atheniensium, quum videret utilissimum Græciæ, ad versus multitudinem Xerxis navium[23], in angustiis Salaminiis decernere, idque persuadere civibus non posset, sollertia effecit, ut a barbaris ad utilitates suas Græci compellerentur: simulata namque proditione, misit ad Xerxen, qui indicaret, populares suos de fuga cogitare, difficilioremque ei rem futuram, si singulas civitates obsidione aggrederetur. Qua ratione effecit, ut exercitus barbarorum primum
