Pagina:Frontin - Les Stratagèmes - Aqueducs de la ville de Rome, trad Bailly, 1848.djvu/122

E Wikisource
Haec pagina emendata est
120
STRATEGEMATICON LIB. II.

15. M. Antonius adversus Parthos, qui infinita multitudine sagittarum exercitum ejus obruebant, subsidere suos, et testudinem facere jussit[31]: supra quam transmissis sagittis, sine militum noxa exhaustus est hostis.

16. Hannibal adversus Scipionem in Africa[32], quum haberet exercitum ex Pœnis et auxiliaribus, quorum pars non solum ex diversis partibus, sed etiam ex Italicis constabat, post elephantos octoginta, qui in prima fronte positi hostium turbarent aciem, auxiliares Gallos, et Ligures, et Baleares, Maurosque posuit, ut non fugere possent, Pœnis a tergo stantibus, et hostem oppositi si non infestarent, at certe fatigarent: tum suis et Macedonibus, qui jam fessos Romanos integri exciperent, in secunda acie collocatis, novissimos Italicos constituit, quorum et timebat fidem, et segnitiem verebatur, quoniam plerosque eorum ab Italia invitos extraxerat. Scipio adversus hanc formam, robur legionis, triplici acie in fronte ordinatum per hastatos et principes et triarios opposuit: nec continuas construxit cohortes, sed manipulis inter se distantibus spatium dedit, per quod elephanti ab hostibus acti facile transmitti sine perturbatione ordinum possent. Ea ipsa intervalla expeditis velitibus implevit, ne interluceret acies: dato iis præcepto, ut ad impetum elephantorum, vel retro, vel in latera concederent. Equitatum deinde in cornua divisit, et dextro Romanis equitibus Lælium, sinistro Numidis Masimssam præposuit: quæ tam prudens ordinatio non dubie causa victoriæ fuit.