17. Archelaus adversus L. Sullam[33], in fronte ad perturbandum hostem falcatas quadrigas locavit, in secunda acie phalangem Macedonicam, in tertia, Romanorum more, armatos auxiliares, mixtis fugitivis Italicæ gentis, quorum pervicaciæ plurimum fidebat; levem armaturam in ultimo statuit. In utroque dein latere equitatum, cujus amplum numerum habebat, circueundi hostis causa, posuit. Contra hæc Sulla fossas amplæ latitudinis in utroque latere duxit, et capitibus earum castella communiit: qua ratione, ne circuiretur ab hoste, et peditum numero, et maxime equitatu superante, consequutus est. Triplicem deinde peditum aciem ordinavit, relictis intervallis, per levem armaturam, et equitem, quem in novissimo collocaverat, ut, quum res exegisset, emitteret. Tum postsignanis, qui in secunda acie erant, imperavit, ut densos numerososque palos firme in terrain defigerent: intraque eos, appropinquantibus quadrigis, antesignanorum aciem recepit. Tum demum, sublato universorum clamore, velites et levem armaturam ingerere tela jussit. Quibus factis quadrigæ hostium aut implicitæ palis, aut exterritæ clamore telisque, in suos conversæ sunt, turbaveruntque Macedonum instructuram. Qua cedente quum Sulla staret, et Archelaus equitem opposuisset, Romani equites subito emissi, averterunt eos, consummaruntque victoriam.
18. C. Cesar Gallorum falcatas quadrigas eadem ratione palis defixis excepit, inhibuitque.
