bus; præcepitque, ut, quum vidisset contractum prœlium, subitus ex diverso se ostenderet, juberetque æneatores concinere. Sonantibus montium jugis, species ingentis multitudinis offusa est hostibus, qua perterriti dedere terga.
4. Acilius Glabrio consul adversus Antiochi regis aciem, quam is in Achaiam pro angustiis Thermopylarum direxerat, iniquitatibus loci non irritus tantum, sed cum jactura quoque repulsus esset, nisi circummissus ab eo Porcius Cato, qui tum, jam consularis, tribunus militum a populo factus in exercitu erat, dejectis jugis Callidromi Ætolis, qui ea præsidio tenebant, super imminentem castris regiis collem, a tergo subitus apparuisset[42]. Quo facto perturbatis Antiochi copiis, utrinque irrupere Romani, et fusis fugatisque castra ceperunt.
5. C. Sulpicius Peticus consul contra Gallos[43] dimicaturus, jussit muliones clam io montes proximos cum mulis abire, et indidem conserto jam prœlio, velut equis insidentes, ostentare se pugnantibus: quare Galli, existimantes adventare auxilia Romanis, cessere jam pæne victores.
6. Marius, circa Aquas Sextias[44], quum in animo haberet postera die depugnare adversus Teutonos, Marcellum cum parva manu equitum peditumque noctu post terga hostium misit, et ad implendam multitudinis speciem, agasones lixasque armatos simul ire jussit,
