Pagina:Frontin - Les Stratagèmes - Aqueducs de la ville de Rome, trad Bailly, 1848.djvu/138

E Wikisource
Haec pagina emendata est
136
STRATEGEMATICON LIB. II.

furiali habitu præferentibus, aciem Romanorum turbaverant.

19. Idem Veientes et Fidenates[51] facibus arreptis fecerunt.

20. Atheas, rex Scytharum, quum adversus ampliorem Triballorum exercitum confligeret, jussit a feminis et pueris, omnique imbelli turba, greges asinorum ac boum ad postremam hostium aciem admoveri, et erectas hastas præferre. Famam deinde diffudit, tanquam auxilia sibi ab ulterioribus Scythis adventarent: qua asseveratione avertit hostem.


V. De insidiis.

1. Romulus[52], per latebras copiarum parte disposita, quum ad Fidenas accessisset, simulata fuga temere hostes insequutos eo perduxit, ubi occultos habebat milites: qui undique adorti effusos et incautos ceciderunt.

2. Q. Fabius Maximus consul auxilio Sutrinis missus adversus Hetruscos, omnes hostium copias in se convertit; deinde, simulato timore, in superiora loca, velut fugiens, recessit, effuseque subeuntes aggressus, non acie tantum superavit, sed etiam castris exuit[53].

3. Sempronius Gracchus[54] adversus Celtiberos, metu simulato, continuit exercitum. Emissa deinde armatura levi, quæ hostem lacesseret, ac statim pedem referret,