evocavit hostem; deinde inordinatos aggressus, usque eo cecidit, ut etiam castra caperet.
4. Metellus consul, in Sicilia bellum adversus Hasdrubalem gerens, ob ejus ingentem exercitum et centum triginta elephantos intentior, simulata diffidentia, intra Panormum copias tenuit, fossamque ingentis magnitudinis ante se duxit. Conspecto deinde exercitu Hasdrubalis, qui in prima acie elephantos habebat, præcepit hastatis, tela in belluas jacerent, protinusque se intra munimenta reciperent. Ea ludificatione rectores elephantorum concitati, in ipsam fossam elephantos egerunt[55]: quo ut primum illaqueati sunt, partim magnitudine telorum confecti, partim retro in suos acti, totam aciem turbaverunt. Tunc Metellus, hanc operiens occasionem, cum toto exercitu erupit, et aggressus a latere Pœnos cecidit, ipsisque et elephantis potitus est.
5. Tomyris[56], Scytharum regina, Cyrum, Persarum ducem, æquo marte certantem, simulato metu elicuit ad notas militi suo angustias, atque ibi, repente converso agmine, natura loci adjuta, devicit.
6. Ægyptii, conflicturi acie in eis campis, quibus junctæ paludes erant, alga eas contexerunt, commissoque prœlio, fugam simulantes, in insidias hostes evocaverunt: qui rapidius vecti per ignota loca, limo inhæserunt, circumventique sunt.
7. Viriathus, ex latrone dux Celtiberorum, cedere
