5. Semiramis adversus eosdem Babylonios, eodem Euphrate averso, idem fecisse dicitur.
6. Clisthenes Sicyonius ductum aquarum in oppidum Crisæorum[30] ferentem rupit; mox affectis siti restituit aquam elleboro corruptam: qua usos profluvio ventris decipiens, cepit.
1. Philippus[31], quum Prinassum castellum nulla vi capere posset, terram ante ipsos muros aggessit, simulavitque agi cuniculum. Castellani, quia subrutos se existimarant, dediderunt.
2. Pelopidas Thebanus, Magnetum duo oppida simul oppugnaturus, non ita longo spatio distantia, quo tempore ad alterum eorum exercitum admovebat, præcepit ut ex composito ab aliis castris quatuor equites coronati[32], notabili alacritate velut victoriam annuntiantes, venirent. Ad cujus simulationem curavit, ut silva, quæ in medio erat, incenderetur, præbitura speciem urbis ardentis; præterea quosdam, captivorum habitu, eodem jussit perduci. Qua asseveratione perterriti, qui obsidebantur, dum in parte jam se superatos existimant, defecerunt.
3. Cyrus, rex Persarum, incluso Sardibus Crœso, qua præruptus mons nullum aditum præstabat, ad mœnia malos exæquantes altitudinem jugi subrexit, quibus
