propugnationi murorum poterant. Ad id latus, a quo solo se tentari putabant, quum confluerent, qua non obsistebatur, muros transcendit.
7. Thrasybulus, dux Milesiorum, ut portum Sicyonioruni occuparet, a terra subinde oppidanos tentavit; et illo, quo lacessebantur, conversis hostibus, classe inexspectata portum cepit.
8. Philippus in obsidione cujusdam maritimæ urbis, binas naves procul a conspectu contabulavit, superstruxitque eis turres: aliis deinde turribus adortus a terra, dum mœnibus[39] propugnatores distringit, turritas naves a mari applicuit, et qua non resistebatur, subiit muros.
9. Pericles Peloponnesiorum castellum oppugnaturus, in quod duo omnino erant accessus, alterum fossa interclusit, alterum munire instituit. Castellani securiores ab altera parte facti, eam solam, quam muniri videbant, custodire cœperunt. Pericles, præparatis pontibus, injectisque super fossam, qua non cavebatur, subiit castellum[40].
10. Antiochus, adversus Ephesios, Rhodiis, quos in auxilio habebat[41], præcepit ut nocte portum cum magno strepitu invaderent. Ad quam partem omni multitudine cum tumultu decurrente, nudatis defensore reliquis munitionibus, ipse ex adverso aggressus civitatem cepit.
