16. M. Cato memoriæ tradidit, in furto comprehensis inter commilitones dextras esse præcisas; aut, si levius animadvertere voluissent, in principiis sanguinem missum.
17. Clearchus, dux Lacedæmoniorum, exercitui dicebat, imperatorem potius, quam hostem, metui debere[13]: significans, eos, qui in prœlio dubiam mortem timuissent, certum, si deseruissent, manere supplicium.
18. Appii Claudii sententia senatus eos, qui a Pyrrho, rege Epirotarum, capti, et postea remissi erant, equites ad peditem redegit, pedites ad levem armaturam, omnibus extra vallum jussis tendere, donec bina hostium spolia singuli referrent[14].
19. Otacilius Crassus consul eos, qui ab Hannibale sub jugum missi redierant, tendere extra vallum jussit, ut immuniti assuescerent periculis, et adversus hostem audentiores fierent.
20. P. Cornelio Nasica, D. Junio consulibus, qui exercitum deseruerant, damnati, virgis cæsi publice venierunt.
21. Domilius Corbulo in Armenia, duas alas et tres cohortes, quæ ad castellum initio hostibus cesserant, extra vallum jussit tendere, donec assiduo labore et prosperis excursionibus redimerent ignominiam[15].
22. Aurelius Cotta consul, quum ad opus equites, necessitate cogente, jussisset accedere, eorumque pars detractasset imperium, questus apud censores, effecit
