rerum naturam, non ad ipsorum propositum pertinere.
10. Pericles, quum in castra ejus fulmen decidisset[100], terruissetque milites, advocata concione, lapidibus in conspectu omnium collisis ignem excussit, sedavitque conturbationem, quum docuisset, similiter nubium attritu excuti fulmen.
11. Timotheus Atheniensis, adversus Corcyræos[101] navali prœlio decertaturus, gubernatori suo, qui proficiscenti jam classi signum receptui cœperat dare, quia ex remigibus quemdam sternutantem audierat, « Miraris, inquit, ex tot millibus unum perfrixisse ? »
12. Chabrias Atheniensis classe dimicaturus, excusso ante navem ipsius fulmine, exterritis per tale prodigium militibus, « Nunc, inquit, potissimum ineunda pugna est, quum deorum maximus Jupiter adesse numen suum classi nostræ ostendit. »
