Pagina:Hesiodus Zamagna.pdf/125

Deiecere solum, vinclisque et compede nexos.
Tantum infra terram subter traxere superbos,
 800Quantum alto caeli tellus a vertice distat.
Par etenim spatium est a terra in tartara: noctes
Acta novem totidemque dies de culmine caeli
Luce gravis decima in terram descenderet incus
Ferrea. rursum eadem totidem noctesque diesque
 805E terra fugiens tenebrosa in tartara subter,
Lapsa die incideret decimo. stant moenia ferro
E solido circum, triplicique affusa meatu
Horrida nox umbris nigrantibus ora coërcet;
Supra terra sedet, vastumque exaestuat aequor.

 810Illic obscura pressum caligine degit
Titanum genus acre, Iovis supera alta regentis
Consilio, ingentisque colit trans ultima terrae
Informi loca senta situ. non exitus ulla
Parte datur: claudit ferratis undique portis
 815Neptunus, caeloque educta utrinque minantur
Molibus impositis adamantina moenia. Cottus
Stat propior, Briareusque, Gygesque, et limina servant