Pagina:Horace - Œuvres, trad. Leconte de Lisle, I.djvu/128

E Wikisource
Haec pagina emendata est






AD MERCURIUM.


Mercuri (nam te docilis magistro
Movit Amphion lapides canendo),
Tuque, Testudo resonare septem
               Callida nervis,
Nec loquax olim, neque grata ; nunc et
Divitum mensis et amica templis ;
Dic modos, Lyde quibus obstinatas
               Applicet aures ;
Quæ, velut latis equa trima campis
Ludit exsultim, metuitque tangi
Nuptiarum expers, et adhuc protervo
               Cruda marito.
Tu potes tigris comitesque silvas
Ducere, et rivos celeres morari ;
Cessit immanis tibi blandienti
               Janitor aulæ,