Pagina:Horace - Œuvres, trad. Leconte de Lisle, I.djvu/132

E Wikisource
Haec pagina emendata est






AD FONTEM BANDUSIÆ.


O fons Bandusiæ, splendidior vitro,
Dulci digne mero, non sine floribus,
     Cras donaberis hædo,
          Cui frons turgida cornibus
Primis, et venerem et prœlia destinat,
Frustra ; nam gelidos inficiet tibi
     Rubro sanguine rivos
          Lascivi suboles gregis.
Te flagrantis atrox hora Caniculæ
Nescit tangere ; tu frigus amabile
     Fessis vomere tauris
          Præbes, et pecori vago.
Fies nobilium tu quoque fontium,
Me dicente cavis impositam ilicem
     Saxis, unde loquaces
          Lymphæ desiliunt tuæ.