Haec pagina emendata est
Maturo propior desine funeri
Inter ludere virgines,
Et stellis nebulam spargere candidis.
Non, siquid Pholoen, satis,
Et te, Chlori, decet : filia rectius
Expugnat juvenum domos,
Pulso Thyias uti concita tympano.
Illam cogit amor Nothi
Lascivæ similem ludere capreæ ;
Te lanæ prope nobilem
Tonsæ Luceriam, non citharæ decent,
Nec flos purpureus rosæ,
Nec poti, vetulam, fæce tenus cadi.
Inclusam Danaen turris ahenea,
Robustæque fores, et vigilum canum
Tristes excubiæ munierant satis
Nocturnis ab adulteris,
