Pagina:Horace - Œuvres, trad. Leconte de Lisle, I.djvu/188

E Wikisource
Haec pagina emendata est



Quam licet sperare nefas putando
Disparem vites. Age, jam meorum
             Finis amorum,
(Non enim posthac alia calebo
Femina) condisce modos, amanda
Voce quos reddas : minuentur atræ
             Carmine curæ.



AD VIRGILIUM.


Jam veris comites, quæ mare temperant,
Impellunt animæ lintea Thraciæ,
Jam nec prata rigent nec fluvii strepunt
         Hiberna nive turgidi.

Nidum ponit, Ityn flebiliter gemens,
Infelix avis et Cecropiæ domus
Æternum opprobrium, quod male barbaras
          regum est ulta libidines.