Haec pagina emendata est
Nec cursus duplicis per mare Ulyssei
Nec sævam Pelopis domum
Conamur, tenues grandia ; dum pudor,
Imbellisque lyræ Musa potens vetat
Laudes egregii Cæsaris et tuas
Culpa deterere ingeni.
Quis Martem tunica tectum adamantina
Digne scripserit ? aut pulvere Troico
Nigrum Merionen ? aut ope Palladis
Tydiden Superis parem ?
Nos convivia, nos prœlia virginum
Sectis in juvenes unguibus acrium
Cantamus, vacui sive quid urimur,
Non præter solitum leves.