Pagina:Horace - Œuvres, trad. Leconte de Lisle, I.djvu/202

E Wikisource
Haec pagina emendata est




Non Afra avis descendat in ventrem meum,
          Non attagen Ionicus
Jucundior, quam lecta de pinguissimis
          Oliva ramis arborum,
Aut herba lapathi prata amantis, et gravi
          Malvæ salubres corpori ;
Vel agna festis cæsa Terminalibus,
          Vel hædus ereptus lupo.
Has inter epulas, ut juvat pastas oves
          Videre properantes domum !
Videre fessos vomerem inversum boves
          Collo trahentes languido ;
Positosque vernas, ditis examen domus,
          Circum renidentis Lares !  » —
Hæc ubi locutus fænerator Alfius,
          Jam jam futurus rusticus,
Omnem redegit Idibus pecuniam,
          Quærit Kalendis ponere.