Haec pagina emendata est
Defixis oculis animoque et corpore torpet ?
Insani sapiens nomen ferat, æquus iniqui,
Ultra quam satis est virtutem si petat ipsam.
I nunc, argentum, et marmor vetus æraque et artes
Suspice ; cum gemmis Tyrios mirare colores ;
Gaude, quod spectant oculi te mille loquentem ;
Gnavus mane Forum, et vespertinus pete tectum,
Ne plus frumenti dotalibus emetat agris
Mutus, et (indignum, quod sit pejoribus ortus)
Hic tibi sit potius quam tu mirabilis illi.
Quidquid sub terra est, in apricum proferet ætas ;
Defodiet condetque nitentia. Cum bene notum
Porticus Agrippæ et via te conspexerit Appi,
Ire tamen restat, Numa quo devenit et Ancus.
Si latus aut renes morbo tentantur acuto,
Quære fugam morbi. Vis recte vivere : quis non ?
