Haec pagina emendata est
Acriter elatrem, pretium ætas altera sordet. »
Ambigitur quid enim ? Castor sciat an Dolichos plus ;
Brundusium Minuci melius via ducat an Appi.
Quem damnosa Venus, quem præceps alea nudat,
Gloria quem supra vires et vestit et ungit,
Quem tenet argenti sitis inportuna famesque,
Quem paupertatis pudor et fuga, dives amicus,
Sæpe decem vitiis instructior, odit et horret ;
Aut, si non odit, regit, ac veluti pia mater
Plus quam se sapere, et virtutibus esse priorem
Vult ; et ait prope vera : « Meæ (contendere noli)
Stultitiam patiuntur opes ; tibi parvula res est ;
Arta decet sanum comitem toga ; desine mecum
Certare. » Eutrapelus, cuicumque nocere volebat
Vestimenta dabat pretiosa ; beatus enim jam
