Haec pagina emendata est
Quod puero cecinit divina mota anus urna :
« Hunc neque dira venena, nec hosticus auferet ensis
« Nec laterum dolor, aut tussis, nec tarda podagra ;
« Garrulus hunc quando consumet cumque : loquaces,
« Si sapiat, vitet, simul atque adoleverit ætas. »
Ventum erat ad Vestæ, quarta jam parte diei
Præterita ; et casu tunc respondere vadato
Debebat ; quod ni fecisset, perdere litem.
— « Si me amas, inquit, paulum hic ades. » — « Inteream, si
Aut valeo stare, aut novi civilia jura ;
Et propero quo scis. » — « Dubius sum, quid faciam, inquit ;
Tene relinquam an rem. » — « Me, sodes. » — « Non faciam, » ille
Et præcedere cœpit. Ego, ut contendere durum est
Cum victore, sequor. — « Mæcenas quomodo tecum ?
