Pagina:Hortus Malabaricus Volume 1.pdf/65

E Wikisource
Haec pagina emendata et bis lecta est
32
HORTUS

dunculo rotundo exsurgit, ac superiora versus nonnihil conicus est, & spicis, parvis, viridibus, crassiolis, cuspidatis scutellatim circumdatus; suntque spicæ in cuspide, quo inferiora versus inflexæ, rubescentes ac rudimentum fructûs continentes: floribus quoque sapor adstringens & acris est.

Fructus, qui spicatim seu racematim crasso petiolo medio viridi, ac tortuoso pedunculis crassis, & curtis circumsident, sunt oblongo-rotundi, magis minusve gibbosi, cortice crassiolo, primùm viridi; cùm maturi, flavo-diluto albicante sapore peracri, odore minùs grato.

Semina, quæ intus continentur se invicem proxime sine ullo intersepimento contingunt, suntque uno latere rotundo ad fructûs formam accommodata, reliquis planis tribus quatuorve pro ratione mutui contactus: constantque, cùm matura, pulpâ tenui, humidâ, sublacteâ, quæ membranâ incarnato-rubra est investita, intus osse grandiusculo nigro.

Flores bis fert in anno, fructus non dat nisi cùm vetustior est. Ex fl. aqua odoris, quæ eorum odorem spirat, distillatur.

VIRES EJUS.

Radix & cortex siccus tritus & mixtus cum lacte spisso dicto Tayr apostematibus aperiendis & maturandis serviunt in forma emplastri appositi; Cortex Radicis in pulvere cum aqua calida datus menstruis in mulieribus excitandis servit, fœtumque in gravidis expellit, si largiùs ac copiosiùs sumatur: Flores triti & cum oleo decocti, pro doloribus capitis, oculorum affectionibus, ut & in podagra serviunt facta capitis unctione. Aqua ex Floribus distillata, præcordiis exhilarandis commoda est; Oleum, in quo Flores per quadraginta dies insolati sunt, in capitis perunctione ejus doloribus ac animi deliquio prodest; Oleum Fructuum flatus pellit, si cum eo corpus ungatur.

FIG. 19.

Nominis affinitas, florum gratissimus odor, aliæque quæ huic Plantæ ab Autoribus adscribuntur circumstantiæ, non difficulter mihi persuadent, candem esse cum ea, quæ à Boutio Cap. 45. describitur, licet fatear ejusdem descriptionem obscuram esse, mutilam, quin & forsan vitiosam: quod primâ fronte

liquebit, si quis eandem cum figura diligentius conferat. An autem eadem sit cum Champe C. Bauhimi, de qua in Pinace inquit: Champe dicuntur alii flores, quorum etiam magnus apud Indos usus est, odore graviori, quàm lilium. Gart. Fragos. pronuntiare vix ausus sum.


ELEN-