AReálu, quæ tertia est species Alu, lingua Bramanum Bipaloè, arbor quoque est procera, densis & opacis frondibus latè sparsis, nascensque in arenosis & petrosis, ac etiam in arboribus, uti Itti-Alu.
Radix crassa radices fibrosas tam subtus quàm super terram longè latéque diffundens, cortice lacteo qui incisus etiam rubeseit.
Caudex crassus, duorum passim hominum amplexum ambitu æquans, cortice lacteo, qui detractus seu incisus etiam rubescit.
Surculi novelli virides geniculati.
Folia quæ longis, tenuibus, rotundis, ac viridi-albicantibus petiolis appendent forma cordis humani, anteriùs angusta ac longa lanceola cuspidata, quæ vetustiora postica parte ad petiolum rectioribus oris, quæ teneriora rotundioribus circumscripta, margine tum æquabili tum in arcus sinuato; suntque solida ac densa, minusque crassa, quàm illa secundæ speciei, lenia & mollia; at quæ vetustiora sunt, rigida, in interiori latere virore nitente & fusco, exteriùs claro.
