Pagina:Les cinquante livres du Digeste ou des Pandectes de l'Empereur Justinien, Tome 1, trad Hulot, 1805.pdf/34

suæ sinceritatis præbeant præsidium. §. 2. Hocque opere consummato et in uno volumine nostro nomine præfulgente, coadunato, cum ex paucis et tenuioribus relevati ad summam et plenissimam juris emendationem pervenire properaremus, et omnem romanam sanctionem et colligere, et emendare, et tot auctorum dispersa volumina uno codice indita ostendere, quod nemo alius neque sperare, neque optare ausus est : res quidem nobis difficillima, imo magis impossibilis videbatur, sed manibus ad cœlum erectis, et aeterno auxilio invocato, eam quoque curam nostris reposuimus animis, Deo freti, qui et res penitus desperatas donare et consummare suae virtutis magnitudine potest. §. 3. Et ad tuæ sinceritatis optimum respeximus ministerium, tibique primo et hoc opus commisimus, ingeni tui documentis, ex nostri codicis ordinatione acceptis : et jussimus, quos probaveris tam ex facundissimis antecessoribus, quam ex viris disertissimis togatis fori amplissimæ sedis, ad sociandum laborem eligere. His itaque collectis, et in nostrum palatium introductis, nobisque tuo testimonio placitis, totam rem faciendam permissimus : ita tamen, ut tui vigilantissimi animi gubernatione res omnis celebretur. §. 4. Jubemus igitur vobis antiquorum prudentium, quibus auctoritatem conscribendarum interpretandarumque legum sacratissimi principes praebuerunt, libros ad jus romanum pertinentes et legere et elimare : ut ex his omnis materia colligatur, nulla, secundum quod possibile est, neque similitudine neque dis