Haec pagina emendata est
2. Triduum sacrum.
3. Festa Epiphaniæ et Ascensionis Domini, Ssm̃æ Trinitatis, Corporis Christi, Cordis Iesu et Christi Regis.
4. Festa Immaculatæ Conceptionis et Assumptionis B. Mariæ Virg.
5. Vigilia et dies octavus Nativitatis Domini.
6. Dominicæ Adventus, Quadragesimæ et Passionis, et dominica in albis.
7. Feriæ I classis superius non nominatæ, nempe: IV cinerum et II, III et IV Hebdomadæ sanctæ.
8. Commemoratio omnium Fidelium defunctorum, quæ tamen locum cedit dominicæ occurrenti.
9. Vigilia Pentecostes.
10. Dies infra octavas Paschatis et Pentecostes.
11. Festa I classis Ecclesiæ universæ superius non nominata.
12. Festa I classis propria, nempe:
1) Festum Patroni principalis rite constituti: a) nationis, b) regionis seu provinciæ sive ecclesiasticæ sive civilis, c) diœcesis.
2) Anniversarium Dedicationis ecclesiæ cathedralis.
3) Festum Patroni principalis rite constituti loci seu oppidi vel civitatis.
4) Festum et anniversarium Dedicationis ecclesiæ propriæ, aut oratorii publici vel semipublici, quod locum tenet ecclesiæ.
5) Titulus ecclesiæ propriæ.
6) Festum Tituli Ordinis seu Congregationis.
7) Festum Fundatoris canonizati Ordinis seu Congregationis.
8) Festum Patroni principalis rite constituti Ordinis seu Congregationis, et provinciæ religiosæ.
13. Festa indulta I classis, primum mobilia, deinde fixa.
Dies liturgici II classis
14. Festa Domini II classis, primum mobilia, deinde fixa.
15. Dominicæ II classis.
16. Festa II classis Ecclesiæ universæ, quæ non sunt Domini.
17. Dies infra octavam Nativitatis Domini.
18. Feriæ II classis, nempe: Adventus a die 17 ad diem 23 decembris inclusive, et feriæ Quatuor Temporum Adventus, Quadragesimæ et mensis septembris.
19. Festa propria II classis, nempe:
1) Festum Patroni secundarii rite constituti: a) nationis, b) regionis seu provinciæ sive ecclesiasticæ sive civilis, c) diœcesis, d) loci seu oppidi vel civitatis.
2) Festa Sanctorum aut Beatorum, de quibus n. 43 d.
3) Festa Sanctorum alicui ecclesiæ propria (n. 45 c).
4) Festum Fundatoris beatificati Ordinis seu Congregationis (n. 46 b).
5) Festum Patroni secundarii rite constituti Ordinis seu Congregationis, et provinciæ religiosæ (n. 46 d).
6) Festa Sanctorum aut Beatorum, de quibus n. 46 e.
20. Festa indulta II classis, primum mobilia, deinde fixa.
21. Vigiliæ II classis.
Dies liturgici III classis
22. Feriæ Quadragesimæ et Passionis, a feria V post cineres usque ad sabbatum ante dominicam II Passionis inclusive, exceptis feriis Quatuor Temporum.
23. Festa III classis, in calendariis particularibus inscripta, et quidem primum festa propria, nempe:
1) Festa Sanctorum aut Beatorum, de quibus n. 43 d.
2) Festa Beatorum alicui ecclesiæ propria (n. 45 d).
3) Festa Sanctorum aut Beatorum, de quibus n. 46 e; deinde festa indulta, primum mobilia, deinde fixa.
24. Festa III classis, in calendario Ecclesiæ universæ inscripta, primum mobilia, deinde fixa.
25. Feriæ Adventus usque ad diem 16 decembris inclusive, exceptis feriis Quatuor Temporum.
26. Vigilia III classis.
Dies liturgici IV classis
27. Officium sanctæ Mariæ in sabbato.
28. Feriæ IV classis.
XII - De dierum liturgicorum occurrentia
92. Occurrentia dicitur occursus duorum vel plurium Officiorum uno eodemque die.
Occurrentia autem dicitur accidentalis, quando dies liturgicus mobilis et dies liturgicus fixus certis solummodo annorum intervallis simul occurrunt; perpetua vero quando duo dies liturgici quotannis simul occurrunt.
93. Effectus occurrentiæ est, ut Officium diei liturgici gradus inferioris Officio gradus superioris cedat: quod fieri potest per minus nobilis omissionem, aut commemorationem, aut translationem, aut repositionem prout numeris sequentibus indicatur.
94. Commemoratio die fixo statuta non transfertur vel reponitur cum festo transferendo vel reponendo, sed fit suo die vel omittitur, iuxta rubricas.
XIII - De dierum liturgicorum occurrentia accidentali eorumque translatione
95. Ius translationis in alium diem ob occurrentiam accidentalem cum die liturgico, qui in tabella præcedentiæ superiorem obtinet locum, competit solummodo festis I classis. Alia festa, ab Officio gradus superioris accidentaliter impedita, aut commemorantur aut, eo anno, penitus omittuntur, iuxta rubricas.
Si vero duo festa eiusdem Divinæ Personæ aut duo festa eiusdem Sancti vel Beati simul occurrunt, fit de festo, quod in tabella præcedentiæ superiorem obtinet locum, et aliud omittitur.