formatio sui in rem. Nonus transformatio rei in seipsum. Ita ab vmbris ad ideas patebit aditus, & accessus, & introitus.
Omne quod est, post vnum; necessario multiplex est & numerosum. Præter vnum igitur atque primum omnia sunt numerus. Vnde sub infimo gradu schalæ naturæ est infinitus numerus, seu materia: in supræmo vero infinita vnitas, actusque purus. Descensus ergo, dispersio, & euagatio fit versus materiam. Ascensus, aggregatio, & determinatio fit versus actum.
Per numeros (inquiunt nonnulli) entia, se habere ad id quod veré est, seu verum ens, sicut materia per inchoationem formarum se habet ad formas.
Triplicem considera formam. Quarum prima est á qua rem ipsam formari contingit, vt poté quæ producit actum: & istam non proprié ideam, vel rerum producendarum formam appellamus. Secunda qua res ipsa formatur tanquam parte: & huic non conuenit similitudinem dici eius, cuius est pars. Tertia quæ aliquid terminat, & figurat tanquam inhærens qualitas: & eiusmodi non potest recipere ideæ rationem, cum ab eo cuius est forma non separetur. Quarta ad quam aliquid formatur, & quam aliquid imitatur: & hæc vsu loquentium consueuit nomen ideæ retinere. Et hæc
